Siri, energjia nën kontrollin e kryengritësve

23:17 / 11.02.2013

Kryengritësit sirianë morën kontrollin e hidrocentralit më të madh të vendit, pas një sulmi që mund të rezultojë me një humbje të rëndësishme strategjike për Damaskun zyrtar.

Ndonëse lajmi nuk është konfirmuar nga Televizioni Shtetëror Sirian, burime të aktivistëve dhe të rebelëve thanë se forcat e tyre janë vendosur në të gjitha hyrjet dhe daljet për në ndërtesën nga ku operohet hidrocentrali, i vendosur mbi një digë madhore mbi lumin Eufrat, në krahinën e Raqës.

Aktualisht, turbinat e HEC-it vazhdojnë të funksionojnë, duke furnizuar vendin me energji.

Marrja në dorë e hidrocentralit të Raqës do të thotë se rebelët kanë praktikisht në dorë fatin e energjisë së vendit, i cili pa këtë HEC në funksionim, ka shumë pak burime të tjera për të siguruar furnizimin e popullsisë me energji.

Ndërkohë, një prej liderëve kryesorë të opozitës kritikoi në mediat ndërkombëtare refuzimin e presidentit Bashar al-Assad, për bisedimet e kërkuara prej tij.

Moaz al-Khatib, pjesëtar i Koalicionit Kombëtar Sirian, deklaroi se “përgjigja e regjimit përbën një sinjal tepër negativ për botën”.

Në zhvillime të tjera nga vendi i ndodhur në luftë civile, banorë të Damaskut thanë se intensiteti i luftimeve të zhvilluara gjatë natës në kryeqytet ishte më i madhi që kishin përjetuar ndonjëherë.

Aktualisht, kryengritësit po përpiqen të organizojnë një mësymje madhore mbi kryeqytet, një lëvizje që potencialisht mund t’i japë fund luftës që i ka kushtuar jetën të paktën 60 mijë sirianëve.

Megjithatë, Damasku vazhdon të jetë i mbrojtur mirë nga forcat e ushtrisë së rregullt, e cila sipas një reportazhi të “CNN”, ndonëse po shfaq shenja lodhje, është ende në gjendje të kontrollojë mirë kryeqytetin dhe institucionet e ndodhura në të. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.