Siri, vritet gazetarja japoneze
Gazetarja japoneze, Mika Yamamoto është vrarë në Siri derisa po raportonte për luftimet ka njoftuar Qeveria e Japonisë. Yamamoto, 45 vjeç, ishte një korrespondente lufte për agjencinë “Japan Press”, me seli në Tokio, ndërsa nuk është e qartë kur dhe ku ka vdekur.
Trupi i gazetares Mika Yamamoto, një korrespondente lufte për shtypin Japoni është transferuar në Turqi, ka deklaruar Masaru Sato, një përfaqësues i diplomacisë japoneze për “Associated Press”.
Një video e postuar në YouTube të hënën nga një aktivist në Siri tregon trupin e vdekur të një gruaje aziatike, të mbuluar me batanije, ku i shihet vetëm fytyra, raportojnë agjencitë e huaja të lajmeve.
Një gazetar i Associated Press, i cili kishte punuar me Yamamoto dhe kishte parë videon ka konfirmuar identitetin e saj.
Ndërkaq, në video, Ahmed Ghazali, një luftëtar në qytetin verior Azaz, ka thënë se Yamamoto është vrarë në Aleppo.
“Ne mirëpresim çdo gazetar që dëshiron të hyjë në Siri”, ka thënë Ghazali. “Ne do të sigurojmë hyrjen e tyre, por ne nuk jemi përgjegjës për brutalitetin e (Presidentit sirian Bashar) forcave të Assadit ndaj mediave”, citohet të ketë thënë ai.
Yamamoto më herët kishte raportuar edhe nga Afganistani dhe Iraku. /Telegrafi/
