Situata në veri imponon forca shtesë të NATO-s
Situata e përgjithshme në veri të Kosovës është edhe më tutje e brishtë dhe ekziston mundësia për përkeqësim të gjendjes. Kjo është arsyeja përse komanda e KFOR-it ka kërkuar aktivizimin e batalionit gjermano-austriak të forcave operative rezervë (ORF), njoftoi Ministria e Mbrojtjes e Gjermanisë.Komandanti i KFOR-it, si theksohet në ueb faqen e kësaj ministrie, sheh edhe më tutje “potencial për përkeqësim të ri të gjendjes”. Duke u nisur nga ky vlerësim i gjendjes, komandanti i KFOR-it, nëpërmjet shërbimeve të NATO-s, ka kërkuar mbetjen e batalionit ORF në Kosovë të paktën deri më 15 dhjetor.
Batalioni italian ORF, që momentalisht gjendet në Kosovë, do të jetë në dispozicion vetëm deri në shtator dhe kjo është arsyeja që Komanda e NATO-s në Napoli më 22 gusht ka dhënë paraurdhër për aktivizimin e batalionit rezervë austriako-gjerman, i cili tashmë është në gjendje gatishmërie, thuhet në ueb faqe, raporton Koha.
Ky batalion duhet të zëvendësojë batalionin italian deri më 30 shtator dhe të jetë në gatishmëri të plotë deri më 1 tetor. Qëllimi është, si theksohet që në këtë mënyrë të përkrahet stabilizimi i mëtejshëm dhe përmirësimi i gjendjes së sigurisë në veri të Kosovës. Ndërkohë Ministria e Mbrojtjes e Austrisë ia konfirmoi agjencisë serbe Tanjug se është duke u përgatitur dërgimi i batalionit të përbashkët me Gjermaninë. /Telegrafi/
