“Skaj”: Lustrimi, eliminime politike
Mediat opozitare maqedonase e kanë quajtur lustrimin si formë të ashpër të ndjekjes dhe pastrimit të hesapeve politike në Maqedoni.Kjo ka të bëjë me vendimin e ri të Komisionit për Lustrimin, që shpalli publike dosjet e 11 personave publik që janë shpallur si bashkëpunëtor të shërbimeve sekrete në të kaluarën, kryesisht të ish-UDB-së.
Portali “Skaj” ka shkruar sot se bëhet fjalë për larje hesapesh me njerëz që nuk i konvenojnë pushtetit aktual. Në këtë rast është përmendur rasti i regjisorit dhe kryetarit të Fondacionit Shoqëria e Hapur në Maqedoni, Vladimir Milcin, i cili është shpallur në listën e 11-shes si ish-spiunë.
“Të gjitha takimet me këtë personalitet janë bërë me kërkesë të shërbimit sekret, për shkak të veprimtarisë së tij armiqësore të zbardhur edhe përmes dokumentit 7 të dosjes. Por shihet qartë se është keqpërdorur procesi dhe bëhet fjalë për skenar për eliminimin politik të disa personalitete”, shkruan portali “Skaj”.
Edhe në rastet e tjera mediat opozitare theksojnë se nuk konfirmohet saktësisht se personat e publikuar vullnetarisht kanë pranuar bashkëpunim me shërbimin sekret. Personat e përmendur kanë paralajmëruar se do të vijojnë procesin nëpër gjykata dhe duke shkuar edhe në adresë të gjykatave ndërkombëtare. /Telegrafi/
