Strukturat e PDK-së po e shtrijnë paaftësinë në arsim
Lidhja Demokratike e Kosovës ka reaguar të hënën ndaj vendimit të ministrit të Arsimit, Ramë Buja lidhur me emërimin e anëtarëve të Këshillit Drejtues të UP-së, duke theksuar se përbërja dëshmon për mosnjohje të natyrës së punës së Këshillit Drejtues të UP-së, meqë ministri ka deleguar gazetarë e pedagogë pa ndonjë lidhje me universitetin dhe me jetën akademike.Ministri i Arsimit, Shkencës dhe Teknologjisë, Ramë Buja, të hënën ka emëruar 4 anëtarët e Këshillit Drejtues të Universitetit të Prishtinës (Elife Podvorica, muzikologe, Arben Fetoshi, drejtor i Radio Kosovës, Muharrem Nitaj, gazetar, dhe Nezir Çoçaj, drejtor i Institutit Pedagogjik të Kosovës), që në KD e përfaqësojnë atë dhe dikasterin që drejton ai.
Sipas LDK-së, përbërja dëshmon për mosnjohje të natyrës së punës së Këshillit Drejtues të UP-së, meqë Buja ka deleguar gazetarë e pedagogë pa ndonjë lidhje me universitetin dhe me jetën akademike.
“Këshilli Drejtues i UP-së duhet të përbëhet nga profesionistë, njerëz me kredibilitet të lartë dhe që i njohin rrjedhat në jetën akademike, si dhe lidhjen e sistemit të arsimit të lartë me ekonominë e tregut. Lidhja Demokratike e Kosovës edhe një herë shpreh shqetësimin e vet për zhvillimet në UP dhe në tërë sistemin arsimin publik të Republikës së Kosovës”, thuhet në kumtesën e kësaj partie.
Lidhja Demokratike e Kosovës thekson se struktura politike e PDK-së në MASHT, tërësisht jokompetente, po e shtrin paaftësinë e vet në tërë sistemin e arsimit. /Telegrafi/
