Tahiri, shumë kërkesa për BE-në

18:47 / 7.02.2013

Udhëheqësja e Dialogut Teknik, Edita Tahiri, ka kërkuar nga BE-ja që të sigurojë lirinë e lëvizjes për qytetarët dhe zyrtarët policorë e doganorë në drejtim të pikave kufitare Jarinjë dhe Bërnjak, si dhe shpërbërjen e strukturave ilegale serbe, në mënyrë që t’u krijohen kushte zbatimit të plotë të marrëveshjeve të arritura në Bruksel.

Sa i përket zgjidhjes së favorshme për tarifat e sigurimit të automjeteve, ajo ka kërkuar mbështetje nga BE-ja për përfaqësimin e Kosovës në Këshillin e Byrosë Evropiane të Sigurimeve përmes një shteti të tretë, me të cilën do të ofroheshin zgjidhje në favor të qytetarëve dhe do të eliminohej problemi aktual i tarifave të papërballueshme të sigurimeve.

Po ashtu u kërkua ndërhyrja e BE-së lidhur me evitimin e problemeve në zbatimin e marrëveshjes për diploma, duke vënë në pah se pagesa e lartë administrative të cilën e ka vendosur pala serbe është në kundërshtim me Marrëveshjen për njohjen reciproke të diplomave sikur edhe problemet e qasjes selektive ndaj kësaj marrëveshjeje.

Këto kërkesa Tahiri i ka bërë gjatë takimit me Drejtorin për Evropën Perëndimore dhe Ballkanin në Shërbimin për Punë të Jashtme të BE-së, Frenando Gentilini, ku për temë diskutimi kishin gjendjen në zbatimin e marrëveshjeve të arritura në mes të Kosovës dhe Serbisë me ndërmjetësimin e Bashkimit Evropian. /Telegrafi/


 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.