Të fortët e PDK-së nuk e pranojnë dënimin me burg

9:23 / 26.12.2012

Dy ish-kryetarët e dënuar me burg, Xhabir Zharku i Kaçanikut dhe Bajrush Xhemajli i Ferizajt, me gjithë dënimet e shqiptuara me burg ndaj tyre, festat e fundvitit pritet t’i presin jashtë grilave.

Derisa Xhemajli do të vazhdojë të jetë afër familjarëve të tij pa probleme me organet e rendit, kolegun e tij, Zharkun, është duke u bërë ndjekur policia. Ai është arratisur dhe vendndodhja e tij ende nuk dihet, shkruan “Koha Ditore”.

“Jemi duke e kërkuar në vazhdimësi, por deri më tash nuk kemi rezultate. Ne kemi planin tonë të veprimit si për përcjellje, vëzhgim, mbledhje të informatave të vendndodhjes..., dhe jemi duke e kërkuar”, ka thënë zëdhënësi i Policisë për rajonin e Ferizajt, Agim Gashi.

E për vendndodhjen e Xhabir Zharkut informacione nuk ka as djali i tij, Mërgimi, i cili vazhdimisht paraqitet në telefonin e të atit që nga arratisja e tij.

“Nuk e di ku është, nuk e kam pa. E a pret Vitin e Ri me neve a jo është problem personal”, ka deklaruar Mërgimi, djali i Xhabir Zharkut.

E ndryshe, nga Zharku, i dënuari tjetër, ish kryetari i Ferizajt, Bajrush Xhemajli do ta presë Vitin e Ri, pa frikë se mund të arrestohet, ani pse atë, Gjykata e Qarkut në Prishtinë e ka dënuar me dy vjet e gjysmë burg për vepër penale të rrezikimit të trafikut publik, që për pasojë pati vdekjen e një të riu.

Xhemajli do të qëndrojë i lirë të paktën deri më 31 dhjetor të këtij viti, pasi kështu ka vendosur Gjykata Kushtetuese e Kosovës, e cila së fundmi ka vendosur masë të përkohshme të ekzekutimit të dënimit me burg prej dy vjet e gjysmë për Xhemajlin.

Gazeta ka provuar të martën të vë kontakt me Xhemajlin, por ai nuk iu është përgjigjur thirrjeve të shumta të redaksisë.

Kushtetuesja e kishte marrë vendimin me arsyetimin se do ta shqyrtojë parashtresën e Xhemajlit me të cilën pretendon se i janë shkelur të drejtat elementare për gjykim të drejtë dhe nuk janë marrë për bazë faktet e mbrojtjes. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.