Tërbohen ujqërit në Bjeshkët e Rugovës

Çdo natë llava e ujqve na sillen rreth vathave dhe krejt çka mund të bëjmë është që t’i trembim me zjarre dhe drita, si dhe me mjete piroteknike’’, ka thënë Halim Rexhbogaj, bari në trevat e Bogës duke shtuar se derisa delet e barinjve kullotnin livadheve të asaj ane, llava e ujqve prej dhjetëra sish, e kanë sulmuar kopenë në mesditë dhe nga tufa kanë ndarë afro 30 krerë dele, derisa me to ishte i biri i tij vetëm 16 vjeçar.

Sipas tij, dhjetë krerë dele, ujqit i kanë prerë në fyt dhe i kanë masakruar aty në kullosa, ndërsa 20 krerë të tjerë, llava e ujqve i ka marrë përpara në drejtim të malit të dendur. Ndërkohë në këtë ndjekje edhe gjashtë krerë dele janë dëmtuar rëndë nga kafshimet dhe kthetrat e këtyre ujqve.

Më tej, bariu Rexhbogaj rrëfen se si pas dy ditëve, ka hasur në gjurmë edhe të dy deleve të tjera, të cilat ujqit i kishin ngrënë, kurse për pjesën tjetër të humbur, ka marrë lajme nga barinjtë e Malit të Zi.

Sipas barinjve të dëmtuar nga ky rast, për ngjarjen është e njoftuar edhe Drejtoria komunale për Bujqësi dhe ekipi i veterinarëve si dhe inspeksionet përkatëse të cilët në vendin e ngjarjes kishin bërë ekspertizën dhe vlerësimin e këtij dëmi të shkaktuar.

Ndërkaq nga ana tjetër, Tahir Cukaj, drejtor i Drejtorisë komunale për Bujqësi dhe Pylltari ka konfirmuar rastin e bariut, i cili nga komuna ka kërkuar ndihmë për dëmin që i është bërë, si dhe ka bërë të ditur së lënda në fjalë është kompletuar me dëshmi nga komisionet përkatëse.

Sipas tij, Drejtoria do të bëjë atë që mundet të ndihmoj këtë blegtor nga Bogë të Rugovës.

Bazuar në sulmet e shpeshta të këtyre llavave të ujqve, blegtorët duke kërkuar që nga institucionet komunale të ndërmarrin masa të duhura, nuk kanë përjashtuar edhe mundësinë që organet kompetente komunale t’u japin atyre armë gjuetie me leje që t’i mbrojnë pasuritë e tyre nga këto egërsira. /Telegrafi/