Thaçi: Platforma serbe, dokument pa vlerë

18:42 / 22.12.2012

Kryeministri i Kosovës, Hashim Thaçi, ka shprehur bindjen se platforma e Serbisë për bisedimet me Kosovën nuk meriton vëmendje të madhe, meqë ajo është e dështuar njëjtë sikurse planet e mëhershme të Beogradit për kontroll mbi Prishtinën. Para anëtarëve të partisë së vet, në Prizren, ai ka pranuar se ka shqetësime e zhurmë publike rreth projektit të fundit të Serbisë, i cili sipas tij nuk do të jetë jetëgjatë dhe do të myket në sirtarët e vet Beogradit.

"Ky projekt i Nikolicit do të mbetet në sirtarët e Beogradit dhe aty do të myket në perspektivën evropiane të Kosovës e të rajonit...Ky është një vullnet i Beogradit i mbrapshtë, është një hap prapa i Beogradit në çështjen që e kemi nisur për vendosjen e fqinjësisë së mirë. Prandaj, qëndrimi i Republikës së Kosovës është i qartë se ai dokument i Nikolicit nuk do ta ketë asnjë vlerë për as për Kosovën, as për BE-në, NATO-n apo ShBA-të, sepse qëndrimi ynë është i konsultuar me bashkësinë ndërkombëtare", ka thënë Thaçi, sot në Prizren.

Ai ka vlerësuar se nuk duhet pasur dilema në këtë drejtim, meqë më e rëndësishmja është konsolidimi i shtetësisë dhe demokracisë së Kosovës.

"E di se është preokupim dhe shqetësim i juaji dhe e di që është bërë më shumë zhurmë sesa që meriton plani i Serbisë për Kosovën. Ju ftoj që mos t\'i kushtojmë shumë rëndësi zhurmës së Beogradit por të ndërtojmë realitetin e Kosovës së pavarur dhe sovrane, ashtu siç po e bëjmë...", ka thënë Thaçi, gjatë fjalimit para anëtarëve të Kuvendit të degës së PDK-së, transmeton Koha.net.

Ai ka garantuar bashkë partiakët dhe qytetarët e vendit se platforma serbe do të dështoj bashkë me ideatorin e saj, Tomislav Nikolic.

"Ashtu siç kanë dështuar elaboratet e Grashaninit në shek XIX, Pashicit e Karagjorgjevicit, Cubriloviçct e Andricit, projektet e komunistëve jugosllavë në krye me Rankovicin, platforma e vitit 1986 e Akademisë serbe, ashtu siç ka dështuar Milosevici, që kaloi edhe në përmasa gjenocidi, siç ka dështuar babai i kësaj platforme dhe babai i Nikolicit, Seseli, ashtu do të dështoj edhe Nikolici", ka deklaruar Thaçi. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.