Thaçi uron festën e Fitër Bajramit

Në këtë ditë të rëndësishme në kalendarin islam, qytetarët e vendit tonë, të besimit islam bashkohen për të shënuar përfundimin e muajit të shenjtë të Ramazanit, muaji më i rëndësishëm i traditave islame.

Kjo është kohë kur familjet dhe miqtë bëhen bashkë për Festën e madhe të Fitër Bajramit, thuhet në urimin e kryeministrit.

Në mesazhin e urimit, më tej thuhet se “paqja dhe solidariteti janë shpirti thelbësor i kësaj feste, dhe unë jam krenar me mënyrën se si populli i Kosovës vazhdimit i ka demonstruar këto vlera të larta.
Uniteti qytetar, harmonia, toleranca ndërfetare dhe ndëretnike është pasuri e Republikës së Kosovës”.

“Kjo festë është një rast për të gjithë ne, si qytetarë të këtij vendi, të ndajmë mes vete gëzimet dhe urimet më të mira, dhe të punojmë për një të ardhme edhe më të mirë për vendin tonë...
Në emër të Qeverisë së Republikës së Kosovës dhe në emrin tim, uroj edhe njëherë të gjithë besimtarët islamë me rastin e Festës së madhe të Fitër Bajramit, duke iu dëshiruar më shumë paqe, harmoni, solidaritet dhe unitet në familjet e tyre”, thuhet ndër të tjera në urimin e kryeministrit Thaçi.

Festën e Fitër Bajramit, besimtarëve myslimanë në Kosovë ua kanë uruar edhe asociacione dhe subjekte të ndryshme poltike në vend. /Telegrafi/