Tiranë, tenton vetëvrasjen duke hipur mbi një vinç
Një 50-vjeçar ka tentuar të kryejë vetëvrasje të shtunën duke kërcënuar se do të hidhet nga vinçi i një pallati në ndërtim në qendër të Tiranës.Ngjarja ndodhi në afërsi të “Ushtarit të panjohur”, në objektin 24-katësh përbri selisë së Partisë Demokratike.
Personi është identifikuar si Xhemal Xhura, 50 vjeç. Nga të dhënat paraprake bëhet me dije se ai ka qenë në një gjendje të rënduar mendore, si pasojë e problemeve ekonomike. Mësohet se 50-vjeçari i divorcuar ka deklaruar se është edhe i përndjekur politik.
Pasi qëndroi rreth 50 minuta në mbi 80 metra lartësi, personi vendosi të kthehet mbrapsht, duke u dorëzuar te forcat e RENEA-s që ndodheshin në tarracën e ndërtesës.
Qindra forca policie, të njoftuara nga kalimtarë të rastit, shkuan në vendin e ngjarjes dhe rrethuan zonën, ndërsa në vendngjarje u grumbulluan edhe qindra qytetarë të cilët ndoqën me ankth ngjarjen.
Roja i objektit deklaroi se nuk ka dijeni se si ky person hipi pa u pikasur nga askush në ndërtesë e më pas edhe ne vinç. /Start/
