Tjetër telashe për ish-presidentin francez, Sarkozy

10:59 / 10.01.2013

Ish-presidenti francez, Nicolas Sarkozy do të hetohet sërish, këtë herë nën akuzën e nxjerrjes së sekreteve në lidhje me një çështje korrupsioni, e njohur ndryshe si “çështja Karachi”.

Lajmin e bën të ditur agjencia franceze “AFP”. Në vitin 2011, zyra e ish-kreut të shtetit pati deklaruar se emri i tij nuk përmendej në asnjë prej çështjeve që kishin të bënin me dokumentet sekrete të çështjes në fjalë.

Nga ana tjetër, pala paditëse pretendon se Sarkozy ka vepruar ndesh me rregullat e konfidencialitetit. Sekretet lidhen me hetimin mbi vdekjen e 11 inxhinierëve francezë në një shpërthim në Pakistan në vitin 2002, që mund të ketë pasur lidhje me ryshfetet e zyrtarëve francezë.

Kjo është një tjetër hije skandali që bie mbi figurën e ish-presidentit francez. Një javë më parë, gazeta britanike “The Independent” shkruante për prova të qarta dhe të pakundërshtueshme që tregonin se Sarkozy ka marrë rreth 50 milionë euro nga ish-diktatori libian, Muamar Gaddafi, transmeton “Top-Channel”.

“Independent” citonte një burim të afërt me grupin hetimor francez që është ngritur për të zbardhur zërat në fjalë. Sipas këtij burimi, një biznesmen libanez i identifikuar si Ziad Takieddine, emri i të cilit doli gjatë hetimeve si ndërmjetës në dhjetëra transaksione monetare mes Francës dhe vendeve të Lindjes së Mesme, ka rrëfyer para hetuesve në Paris se Sarkozy ka përfituar rreth 50 milionë euro nga Gaddafi.

Gjithnjë sipas gazetës britanike, biznesmeni ka deklaruar se ishte në gjendje të dokumentonte me prova të pakundërshtueshme se fushata zgjedhore e Sarkozy në 2006 dhe 2007 është financuar fuqimisht me paratë që mbërrinin nga Tripoli. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.