Torturohen dy shqiptarët e paraburgosur

Denoncimi është bërë nga familjarët e personave të paraburgosur dhe më pas është konfirmuar edhe nga Avokati i Popullit, Ixhet Mehmeti. Familjarët që kanë vizituar të paraburgosurit, kanë vërejtur se të afërmit e tyre kanë shenja të dukshme, që tregojnë se janë keqtrajtuar.

Partitë shqiptare kanë dënuar ashpër dhunën ndaj dy të paraburgosurve. Partia Demokratike Shqiptare, ka kërkuar dorëheqjen e ministrit të Drejtësisë Blerim Bexheti, që është kuadër i partisë shqiptare në pushtet BDI.

"Ministri i Drejtësisë Blerim Bexheti, duhet të kërkonte përgjegjësi ndaj drejtorit të burgut të Manastirit, ku u keqtrajtuan të paraburgosurit. Unë pres tani që ministri i Drejtësisë të japë dorëheqje. Imagjinoni, ndodh keqtrajtimi i qytetarëve shqiptarë në një ministri që udhëhiqet nga kuadër i BDI-së", tha Zijedin Sela, deputet i PDSH-së, transmeton Kosovapress.

Ndërkohë, ministri i Drejtësisë, Blerim Bexheti ka vizituar burgun e Manastirit për të inspektuar nga afër gjendjen lidhur me këtë rast. Ai ka thënë se ka urdhëruar drejtorinë që hetoi rastin dhe të veprojë në përputhje me dispozitat ligjore. Partia tjetër opozitare RDK, dyshon se në mungesë të fakteve për të akuzuarit, institucionet e shtetit po përdorin dhunën për të detyruar ata të pranojnë fajin që nuk e kanë bërë.

"Mendoj se përdorimi i forcës kundër të arrestuarve dëshmon qartë ndoshta hetuesia nuk ka argumente të forta dhe nëpërmjet përdorimit të forcës maltretimit, tentohet të nxirren edhe të dhëna relevante që të mund të akuzohen", tha Izet Zeqiri, deputet i RDK-së.

Shqetësime lidhur me ushtrimin e dhunës ndaj dy të paraburgosurve kanë shprehur edhe organizatat ndërkombëtare për të drejtat e njeriut, përfundon ky reagim. /Telegrafi/