Totozani: Problem, moszbatimi i vendimeve të gjykatave
Presidenti i Shqipërisë, Bujar Nishani është takuar të enjten me Avokatin e Popullit, Igli Totozanin, me ç’rast kanë biseduar për problemet me të cilat përballet shoqëria shqiptare.Nishani e siguroi Totozanin se e mbështet fuqishëm Institucionin e Avokatit të Popullit në misionin e tij fisnik në mbrojtje të të drejtave të njeriut, duke e garantuar se do të jetë gjithmonë në krah të tij në kuadër të bashkëpunimit institucional, për t’u ardhur në ndihmë qytetarëve të thjeshtë.
.jpg)
Presidenti Nishani u fokusua tek qasja në drejtësi për qytetarët, eliminimi i vonesave në praktikat gjyqësore si dhe kërkoi nga Avokati i Popullit të jetë aktiv në trajtimin e rasteve shqetësuese që prekin funksionimin e gjyqësorit.
Në këtë drejtim, Nishani e siguroi Avokatin e Popullit për mbështetjen e Tij, në pozicionin e Kryetarit të Këshillit të Lartë të Drejtësisë, për adresimin e këtyre problematikave.
Ndërsa, Avokati i Popullit shprehu vlerësimin për vizionin e presidentit Nishani lidhur me bashkëpunimin mes dy institucioneve.
Totozani vuri në pah në dy probleme të rëndësishme, atë të moszbatimit të vendimeve të gjykatave, të cilin e konsideroi një “nyje gordiane” për sistemin e drejtësisë në vend, dhe trajtimin me prioritet të grupeve vulnerabël të shoqërisë. /Telegrafi/
