Tre të vdekur në aksident komunikacioni
Rritet bilanci i viktimave nga aksidenti i rëndë, i cili përgjaku rrugët e jugut të vendit mesditën e sotme. Burime nga vendngjarja bëjnë me dije se bilanci i viktimave ka shkuar në 3 të vdekur, pasi një nga 9 të plagosurit nuk i ka rezistuar plagëve të marra. Aksidenti i rëndë, me pasojë 3 të vdekur dhe 8 të plagosur, ka ndodhur rreth orës 14:00 në aksin rrugor Gjirokastër- Kakavijë, në vendin e quajtur Vanister.
Burime nga vendi i ngjarjes bënë të ditur se si pasojë e përplasjes së 3 automjeteve ka humbur jetën mjeku i spitalit të Gjirokastrës, Tahir Bitri, dhe 70-vjeçarja Sose Nikolla, e cila udhëtonte me furgon. Viktima e tretë, identiteti i të cilit nuk behet ende i ditur u shënua rreth orës 15:51. Mjeket u përpoqën për t’i dhënë gjithë ndihmën e duhur, por fatkeqësisht nuk mundi ti rezistojë plagëve të marra duke humbur jetën në reanimacion, transmeton BalkanWeb.
Ndërkohë mësohet se kanë marrë plagë të gjithë personat e tjerë që udhëtonin në makinat e përfshira në aksident, një “Ford Fokus” me targa TR 6415T, një furgon me pasagjerë, me targa GJ253 A dhe një “Reno Clio” me targa të Gjirokastrës 1349 B.
Mësohet se furgoni me pasagjerë, që drejtohej nga shtetasi Xhevair Likaj u përplas fillimisht me mjetin tip Ford, që drejtohej nga Entela Bitri dhe më pas me makinën tjetër tip Reno, në drejtimin së cilës ishte shtetasi Lefter Aliko.
Policia mbërriti menjëherë në vendngjarje dhe bëri të mundur transportimin e të gjithë të plagosurve drejt spitalit “Omer Nishani”, prej ku mësohet se dy prej tyre, Klodian Shahipi dhe Ledjon Zeno, janë në gjendje të rëndë dhe pritet të nisen drejt Spitalit Ushtarak të Tiranës.
Ndërkohë policia vijon hetimet për të zbuluar shkaqet e aksidentit tragjik. /Telegrafi/
