Vdekje e dyshimtë
Një person i moshës rreth 25- vjeçare ka gjetur vdekjen si rezultat i plagëve të marra nga armë zjarri. Rasti iniciohet si vdekje nën rrethana të dyshimta me elemente të vetëvrasjes. Policia e Kosovës ka pranuar një informatë lidhur me një rast të vetëvrasjes së raportuar të ketë ndodhur në fshatin Polac të komunës së Skenderajt. Rasti është raportuar nga anëtarët e familjes së të ndjerit, të cilët e kishin takuar viktimën të shtrirë në oborr, rreth 50 metra larg shtëpisë.
Në komunikatën e Policisë së Kosovës thuhet se njësitë e para reaguese të policisë, në vend të ngjarjes kanë takuar trupin e pajetë të mashkullit, të identifikuar si; M.Koci (1987), në pozicion të shtrirë, me një plagë hyrëse, në pjesën e parme të trupit, të shkaktuar nga armë zjarri, ndërsa arma e gjuetisë, e cila besohet se ishte përdorur në këtë rast, është identifikuar pranë trupit të vdekur.
Mjeku kujdestar i shtëpisë së shëndetit i cili ka dalë në vend të ngjarjes ka konstatuar vdekjen e viktimës.
Marrë parasysh rrethanat në të cilat është regjistruar rasti, policia ka njoftuar prokurorin publik të prokurorisë së qarkut në Mitrovicë i cili ka autorizuar hetuesit e policisë së Kosovës së bashku ne teknikët e kriminalistikës, të bëjnë ekzaminimin e vendit të ngjarjes dhe inicimin e hetimit të rastit për të sqaruar rrethanat e rastit të paraqitur.
Bazuar në raportet e para të hetuesve policor, në vend të ngjarjes nuk janë identifikuar elemente që do të karakterizonin rastin si vepër penale.
Në vend ngjarje, hetuesit policor kanë gjetur dhe marrë si pjesë të provave materiale; një gëzhojë dhe pushkën e gjuetisë, dy tytëshe, e cila besohet të ishte përfshirë në rast ndërsa do të procedohen për ekzaminim të mëtejmë.
Rasti është kualifikuar si vdekje e dyshimtë me elemente të vetëvrasjes klasike të parapërgatitur nga viktima ndërsa me urdhër të prokurorit, trupi i pajetë është dërguar në institutin e mjekësisë ligjore në Prishtinë për obduksion. /Telegrafi/
