Vdes i burgosuri në burgun e Shkupit
I burgosuri Mensur Iljazi, në burgun hetues të Shkupit, ka ndërruar jetë mbrëmë, ndërsa jozyrtarisht mësohet se ka pësuar nga infarkti.51 vjeçari nga Çegrani i Gostivarit u arrestua para një jave pas vrasjes së Imer Zeqirit, 62 vjeçarit nga Gostivari dhe punëtores së tij Qanie Ruçi, 39 vjeç nga Dibra, e cila ndërroi jetë disa ditë më parë, informon INA.
Gjykatës hetues informoi sot se i Mensur Iljazi, që gjendej në paraburgim, ka pësuar sulm në zemër, dhe pas shumë përpjekjeve për shpëtim, ai ka ndërruar jetë gjatë dërgimit për në Spitalin e Shkupit.
Gjykatësi hetues theksoi se Iljazi do të duhej të dënohej për vrasje të dyfishtë, mirëpo pas vdekjes së tij, mbyllet procesi gjykimit.
Iljazi për motive xhelozie në natën e 8 tetorit ka shtënë me armë zjarri në drejtim të Imer Zeqirit pranë lokalit të tij “Top Kapi” në Gostivar, duke e lënë të vrarë atë, dhe duke e plagosur kamerieren e tij Qanie Ruçi, e cila para disa ditëve ndërroi jetë, për shkak të plagëve të rënda. Policia bëri të ditur se vrasja kishte ndodhur për shkak të motiveve të xhelozisë, pasi që vrasësi më parë kishte pasur lidhje dashurie me Qanie Ruçi. /Telegrafi/
