Verveer do ta vizitojë Prishtinën dhe Sarajevën
Ambasadorja amerikane për çështje globale të grave, Melanne Verveer do të qëndrojë në Sarajevë dhe Prishtinë, nga 2 deri më 6 tetor, për t’u takuar me udhëheqës politik, me mbrojtës të të drejtave të grave, si dhe me përfaqësues të shoqërisë civile.
Qëllimi i vizitës së saj është promovimi i dialogut, bashkëpunimit dhe veprimeve të përbashkëta në avancimin e gruas në rajonin e Ballkanit.
Nga 4 deri më 6 tetor, ambasadorja Verveer do të qëndrojë në Prishtinë, ku do të mbajë fjalimin e saj në Samitin Ndërkombëtar të Gruas, me temën: “Partneriteti për ndryshim - fuqizimi i gruas”, të organizuar nga presidentja e Kosovës, Atifete Jahjaga, raporton QIK.
Ky samit, i pari i këtij lloji në Ballkan, do të adresojë çështje të zhvillimit të gruas, pjesëmarrjes politike dhe statusit social të saj. /Telegrafi/
