Viktimat e para shqiptare në Damask
Nga bombardimet e forcave qeveritare në Damask merret vesh se kanë rënë viktimat e para të “arnautëve”, banorë vendës me origjinë nga Kosova.Burime të afërta me arnautët e Sirisë, që përqendrohen në dy lagje në Damask: në Jug (Kadam) dhe në veri (Divanje), bëjnë me dije se dje, me rastin e operacionit të “pastrimet e qytetit prej terroristeve”, ushtria siriane bombardoi dhe shkatërroi shumë shtëpi në pjesën jugore të Damaskut, ku gjendet “Lagjja e arnautëve”, raporton Koha.
Me këtë rast ranë dhjetëra të vrarë e të plagosure, në mesin e tyre edhe Munir Arnauti (me origjinë nga Podujeva), e Behlul Arnauti (me origjinë nga Kalishani). Numri i saktë i viktimave mund të dihet vetëm pas tërheqjes së forcave të regjimit të Bashar al Assadit prej kësaj pjese të Damaskut.
Sirianët prej 16 muajsh po bëjnë përpjekje të rrëzojnë Assadin, i cili e mori pushtetin në vitin 2000 nga i ati, Hafez, që kishte udhëhequr Sirinë për 29 vjet. Pasi protestat filluan të shtypen me dhunë, opozita u vu në lëvizje duke formuar Ushtrinë e Lirë të Sirisë dhe tashmë vendi thuajse ndodhet në luftë civile. Më shumë se 16 mijë veta janë vrarë gjatë kësaj periudhe, shumica prej tyre civilë. /Telegrafi/
