Vizitë zyrtare në plazh
Një zyrtar i lartë i Ministrisë së Bujqësisë, Sadi Peroshi, është parë duke shëtitur në qytetin e Durrësit fundjavën e kaluar, së bashku me familjen, me veturë zyrtare. Vetura e tipit Mercedes, ngjyrë metalike, me targa 3Z 001 16, e regjistruar në emër të Ministrisë së Bujqësisë, është vërejtur duke kaluar nëpër rrugët e Durrësit, të shtunën, më 9 qershor. Në këtë veturë janë parë edhe fëmijë.
Zëdhënësi i ministrisë së bujqësisë, Adil Behramaj, i tha Gazetës Jeta në Kosovë se zyrtari në fjalë, Sadi Peroshi, ka qenë në udhëtim zyrtar.
“Ky zyrtar ka marrë pjesë në një punëtori të strategjisë kundër drogës, e organizuar nga ministria e punëve të Brendshme në Durrës. Kanë qëndruar në hotelin Dolce Vita. Zyrtari ka marrë pjesë këtu, pasi që droga është prodhimtari bimore”, tha Behramaj.
Mirëpo, në dokumentin zyrtar të MPB-së, që ka përpiluar pjesëmarrësit në këtë grup punues, nuk vërehet asnjë zyrtar i Ministrisë së Bujqësisë.
Gazeta i dha mundësi Peroshit që të shpjegohet, por nuk ka marrë koment prapa nga ai. /Telegrafi/
