Vritet një gjeneral i forcave siriane
Televizioni shtetëror i Sirisë thotë se gjenerali i forcave ajrore, Abdullah Mahmud al-Khalidi, është vrarë në një lagje periferike të Damaskut. Sipas këtij mediumi, vrasja ka ndodhur sot nga grupe terroriste të armatosura, në distriktin al-Din.
Dita e sotme gjithashtu është karakterizuar me përplasje ndërmjet forcave rebele dhe trupave të përkrahura nga luftëtarët palestinezë, në një kamp refugjatësh në afërsi të Damaskut, transmeton Rel.
Ndërkohë i dërguari i Kombeve të Bashkuara dhe i Ligës Arabe për Sirinë, Lakhdar Brahimi ka arritur sot në Kinë, për të kërkuar mbështetje për përpjekjet e tij për ta ndalur dhunën në Siri.
Brahimi ka shkuar në Pekin nga Moska, ku mbajti takime me Ministrin e Jashtëm të Rusisë, Sergei Lavrov.
Pas takimit të djeshëm me Lavrov, ai tha se kriza në Siri është duke u përkeqësuar. /Telegrafi/
