Wollfarth: Kryeprokurorin mbajeni larg fushatës
Ambasadori i OSBE-së në Shqipëri, Eugen Wollfarth, pas një takimi me kryeprokuroren e vendit, Ina Rama, deklaroi para gazetarëve se ka shumë rëndësi kryerja e reformës në drejtësi. Pavarësia e institucioneve, mbetet thelbësore, shtoi ai."Është e rëndësishme puna e institucioneve të pavarura, siç është Prokuroria e Përgjithshme, të cilën unë sapo e vizitova. Respektimi i kësaj pune të pavarur, është me rëndësi për Shqipërinë”, tha kreu i prezencës së OSBE,
Duke e ndalur vëmendjen e tij tek zgjedhja e kryeprokurorit të ri, që siç tha Wollfarth do përkojë edhe me kohën ku partitë politike do kenë nisur fushatën për zgjedhjet e vitit 2013-të, ai apeloi për gjetjen e një figure të përshtatshme dhe jo të politizuar.
“Të përdoren këto muaj për të gjetur një njeri të duhur në krye të atij institucioni, i cili të jetë i kualifikuar dhe të kryejë një punë të pavarur. Unë i bëj thirrje palëve politike për të kërkuar një person të përshtatshëm për këtë pozicion dhe ta mbajnë këtë jashtë fushatave politike”, shtoi Wolfarth, transmeton “BalkanWeb”.
Gjatë fjalës së tij, Wollfarth gjeti rastin të vlerësonte figurën e kreut aktual të organit të akuzës, Ina Ramën, për të cilën tha se: “Jam i impresionuar nga puna që ka bërë Ina Rama, madje edhe në kohë të vështira”. /Telegrafi/
