Zjarret rrezikojnë një repart ushtarak dhe shtatë shtëpi
Një zjarr i përmasave të mëdha ka rënë sot pasdite në një masiv pyjor, ndërkohë që prej tij është vënë në rrezik një repart ushtarak, që ndodhet aty pranë. Ndërsa zjarri që ka përfshirë masivin pyjor pranë fshatit Pogaj të rrethit të Hasit, rrezikon të djegë shtatë shtëpi banimi.Zjarri ka rënë në afërsi të vendit të quajtur Gjergjan, ndërkohë që rreziku bëhet më i madh, pasi në brendësi të repartit ka armatime të ndryshme.
Mësohet se zjarrfikësit kanë mundur të ndërhyjnë në kohën kur zjarri kishte avancuar brenda rrethimit të repartit. Ata kanë larguar flakët 30 metra larg rrethimit.
Një zjarr i madh prej dy ditësh ka përfshirë masivin pyjor pranë fshatit Pogaj të rrethit të Hasit. Deri tani zjarri ka djegur dhjetëra hektarë me pyje e kullota.
Banorët e zonës janë organizuar për shuarjen e flakëve të zjarrit, por deri tani nuk ia kanë arritur ta lokalizojnë atë, pasi vatra sa vjen e përhapet për shkak të erës qe nuk është ndalur gjatë 24 orëve të fundit. Ndërkohë, komunitetit i mungojnë tërësisht mjetet e shërbimit zjarrfikës, ndërsa atje nuk mund të ndërhyhet me mjete të mekanizuara pasi mali është në një lartësi mbi 1500 metra mbi nivelin e detit.
Ajo qe e rendon me tepër situatën është fakti se 7 shtëpi banimi rrezikojnë të digjen plotësisht pasi janë shumë pranë rrezes ku vatra e zjarrit është shfaqur. Gjatë natës së mbrëmshme tre familje me më shumë se 20 anëtarë kanë qenë seriozisht të rrezikuar pasi zjarri është afruar rreth 20 metra larg banesave të tyre.
Vatra e zjarrit nuk po rrezikon vetëm shtëpitë e banorëve, por edhe antenat e kompanive telefonike apo kanaleve televizive, pasi të gjitha antenat janë të vendosura ne piken me te larte për shpërndarjen e sinjaleve telefonike apo televizive, transmeton BalkanWeb. /Telegrafi/
