Nëna e Eda Zarit: Ajo na vodhi pasurinë me dokumente false!
Nëna e këngëtares Eda Zari, Zhane Zari, e ka akuzuar të bijën për falsifikim dokumentesh në marrjen e pronave të familjes, ku pjesëtarë janë edhe fëmijët e tjerë.“E kam të vështirë më besoni, se jam një grua që i ka kaluar të ’70-at dhe kurrë s’e kam menduar se do përballesha në këtë moshë me vajzën time të vogël, Edën, të cilën bashkë me bashkëshortin e çuam që 17 vjeç në Gjermani, ku filloi studimet në Muzikë, pra i mundësuam një jetë ndryshe për ta çuar më tej talentin e saj…”.
“Arsyeja është që unë konstatova se Eda ka përvetësuar padrejtësisht dy prona të familjes, duke falsifikuar dokumentet dhe kjo më çuditi. I kërkova sqarim në telefonon, po ajo u mërzit shumë dhe tashmë nuk komunikojmë më fare”.
“Bëhet fjalë për një apartament në Durrës dhe një dyqan 64 metra katrorë në lagjen ‘21 Dhjetori’ në Tiranë. Për apartamentin në Durrës mu desh të kërkoja dokumentet e kontratës së shitblerjes që im shoq, i cili tashmë nuk jeton më prej pesë vjetësh pasi humbi jetën në një aksident tragjik, e kishte blerë në emrin e tij. Apartamenti kushtoi 50 milionë në atë kohë dhe ne i paguam në dorë personit që na e shiti vetëm 20 milionë. Pjesën tjetër ramë dakord ta shlyenim me këste mujore, që ishte një milion e gjysmë të vjetër në muaj. Të gjitha faturat u paguan nga im shoq, Ismaili, kur ishte gjallë, ndërsa këstin e fundit të shtëpisë e pagoi Eda. Para një muaji, kur hapa dokumentet e shtëpisë, pashë që ajo me shkrim dore kishte shtuar emrin e saj Eda, para Ismail Zari, që është babai i saj, i cili kishte blerë shtëpinë. E telefonova dhe i kërkova të më jepte sqarime se përse e kishte bërë një veprim të tillë pa më thënë mua dhe ma preu shkurt, që shtëpia ishte e saj, pra e kishte blerë ajo. Unë me të drejtë i kërkova të më thoshte arsyen, se më kishte marrë dokumentet origjinale, të cilat i kishte falsifikuar, duke shtuar para emrin të babait emrin e saj”.
“Shkova te noteri që ishte marrë me këto dokumente dhe ai u acarua kur i kërkova dokumentin. Më tha të pija një kafe derisa ta gjente dosjen dhe pastaj më dha një dokument që vërteton se Eda është pronarja e shtëpisë. Por unë dyshoj se është falsifikuar gjithçka... Eda këmbëngul që shtëpinë në Durrës e ka blerë vetë ajo, ndërsa unë jam dëshmitare që atë shtëpi e kam blerë unë me bashkëshortin”, ka rrëfyer nëna e këngëtares në një intervistë për Panorama. /Telegrafi/
