Organizatorët e Grammy: Mbulojeni trupin tuaj!
Organizatorët e Grammy Awards kanë vendosur t’i japin fund zbulimit të tepruar të pjesëve të trupit në këtë ceremoni. Evenimenti madhështor do të mbahet të dielën (10 shkurt) në Staples Center të Los Angelesit, ndërsa organizatorët e spektaklit i kanë caktuar disa rregulla të veshjes.“Ju lusim që të kujdeseni që prapanica dhe gjinjtë e femrave të jenë të mbuluara në mënyrë adekuate. Ju lusim që të shmangni shfaqjen e trupit lakuriq nën format e prapanicës dhe vet prapanicën. Po ashtu, është problematike shfaqja e pjesëve rreth gjinjve”, shkruan mes tjerash në ‘rregulloren’, e cila iu është dërguar pjesëmarrësve.
Yjet këshillohen që të shmangin veshjet transparente, përmes së cilave mund të shihen gjinjtë, apo organet gjenitale. Po ashtu, është e ndaluar pjesëmarrja me veshjet që mbajnë logo të ndonjë kompanie.
Në të kaluarën yjet janë shfaqur me lloj-lloj veshjesh duke zbuluar shumëçka. Përmendim Jeniffer Lopez, e cila në vitin 2000 kishte veshur një fustan që tregonte të gjitha ‘cilësitë’ e saj, po ashtu edhe Pink është shfaqur me një kostum thuajse e zhveshur.
Sido që të jetë, ekziston dyshimi nëse yjet do t’i përmbahen kësaj rregulloreje. /Telegrafi/
