Petrit Çeku të performojë në Amerikë
Një prej kitaristëve më të mirë në Europë, Petrit Çeku, do të performojë brenda disa javësh në Shtetet e Bashkuara të Amerikës, më saktësisht në Florida. Ai është ftuar nga Florida Guitar Foundation që të performojë më 3 nëntor në Florida, ndërsa organizatorët në njoftimin zyrtar kanë theksuar se janë të nderuar që të prezantojnë para publikut amerikan kitaristin shqiptar, duke e vlerësuar si virtuoz i kitarës klasike.
Petrit Çeku lindi në Prizren, ku mori mësimet e para nga kitaristi Luan Sapunxhiu, ndërsa ndër vitesh është shndërruar në një prej kitaristëve më të mirë. Akademinë muzikore e përfundoi në Zagreb, ndërsa studimet postdiplomike po i ndjek në Baltimore të SHBA-ve, në klasën e kitaristit legjendar Manuel Barrueco. /Telegrafi/
