QKK në debatin për industrinë e filmit
Në kuadër të aktiviteteve të Qendrës Kinematografike të Kosovës, drejtori Fatos Berisha dhe kryesuesi i Bordit Arben Zharku, morën pjesë në debatin për industrinë e filmit, të organizuar nga European Film Market.Tema e debatit, që mblodhi mbi 100 profesionistë të akredituar në Berlinale, ishte financimi alternativ i filmit, apo i ashtuquajturi “Financim nga publiku” (Crowd Funding).
“Ishte një debat i frytshëm për temën më të rëndësishme për filmin sot: financimin. Industria e filmit, duke pas parasysh krizën globale financiare, po gjurmon edhe metodat alternative të financimit. Siç pamë nga diskutimet, metoda ‘crowd funding’ - ku fondet në fazën parapërgatitore mblidhen në forma të ndryshme edhe nga audienca - ishte një përvojë e mirë për ne. QKK, në kuadër të aktiviteteve të shumta të stendës sonë në Berlinale, po merr pjesë në evente të ndryshme, si ky i organizuar nga European Film Market”, theksoi drejtori Berisha.
Në panelin e debatit ishte edhe Juliane Schultze, përfaqesuesja organizatës gjermane “Peacefulfish” – e njohur për konsulencat në lëmin e kinematografisë dhe çështjes së mediave - e cila së fundmi është ftuar të jap këshilla për grupin punues të Ministrisë së Kulturës, për ndryshimin e Ligjit për kinematografi të Kosovës. /Telegrafi/
