LAJMI I FUNDIT:

Ministrja Kusari – Lila në Forumin Global Ekonomik në Londër

Ministrja Kusari – Lila në Forumin Global Ekonomik në Londër

Zëvendëskryeministrja dhe ministrja e Tregtisë dhe Industrisë, Mimoza Kusari – Lila, po merr pjesë në Forumin Global Ekonomik të organizuar nga Biznesi Ndërkombëtar dhe Shkëmbimi Diplomatik, ku është debatuar mbi praktikat më të mira në tregti dhe promovim të investimeve.

Ministrja Mimoza Kusari – Lila adresoi çështjet që kanë të bëjnë me Reformat në të Bërit Biznes”, Investimet në Infrastrukturë Publike, Partneriteti Publiko Privat, si dhe Përkrahja e Sektorit Privat.

“Kompanitë tona nuk do të jenë të suksesshme, nëse ballafaqohen me procedura të gjata dhe të kushtueshme. Për këtë arsye, ne duhet të punojmë në eliminimin e barrierave, ku do të rritej konkurrenca dhe njëkohësisht do të stimuloheshin bizneset për të investuar në hulumtim dhe zhvillim”, theksoi ajo.

Përveç progresit të Kosovës në raportin e fundit të Bankës Botërore për të Bërit biznes, zëvendëskryeministrja Kusari – Lila përmendi Zonat e Lira Ekonomike, që ka për qëllim stimulimin dhe nxitjen e investimeve në Kosovë, duke iu ofruar investitorëve infrastrukturë të përshtatshme për zhvillimin e veprimtarive afariste.

Para krerëve të lartë të shteteve të shumta, ministrja Kusari – Lila përmendi inovacionin si indikator i rritjes së produktivitetit, por edhe menaxhimit të kulturës moderne të ndërmarrësisë, e cila do t’u mundësojë të rinjve të aplikojnë njohuri në vend, duke pasur impaktin global. Për fund, ajo tha se punësimi i ri krijohet nga bizneset e reja “start-ups”, mirëpo rritja e qëndrueshme e punësimit vjen nga ndërmarrjet e vogla dhe të mesme ekzistuese. “Për këtë arsye ne kemi identifikuar sektorët me prioritet të lartë potencial siç janë: procesimi i bizneseve për outsourcing, procesimi i ushqimit, sektori i energjisë dhe minierave etj”, theksoi ajo.

Ndërkaq, në sesionin e parë u diskutua për rëndësinë e biznesit ndërkombëtar dhe diplomacisë në tregti dhe promovim të investimeve, ku përfaqësues të lartë nga Kina, Shtetet e Bashkuara të Amerikës dhe Britanisë së Madhe treguan praktikat më të mira nga vendet që vijnë, si dhe një debat i mirëfilltë pasoi në rolin e biznesit ndërkombëtar dhe diplomacisë në tregti dhe promovim të investimeve.

Më pas u mbajtën edhe një sërë sesionesh, ku u diskutua për sistemin gjyqësor, rolin diplomatik në promovimin e investimeve, roli i agjencioneve për Promovim të Investimeve në tërheqjen e investimeve, si dhe paneli për praktikat më të mira në tregti dhe promovim të investimeve.

Ky forum ka për qëllim inkurajimin e fokusit më të madh në praktikat më të mira në tregti dhe investime dhe shërben si rrjetëzim i rëndësishëm duke marrë parasysh që mbledh përfaqësues më të lartë të shteteve të shumta nga industritë të ndryshme.
Shtesë kësaj është një mundësi e mirë kur përfaqësues të lartë të shteteve prezantojnë ambientin për investime duke shërbyer si urë lidhëse për bashkëpunim të mëtutjeshëm. /Telegrafi/