Mundësia e fundit për votuesit e kontestuar për të konfirmuar të drejtën e tyre të votës

Gjatë inspektimit publik, për 30 mijë votuesit e lënë jashtë listës së zgjedhësve do të vlejnë rregullat e njëjta si për të gjithë qytetarët tjerë. Nga KSHZ akoma nuk kanë vendosur nëse paraqitja elektronike përmes ueb aplikacionit do të mbetet si opsion por ata do të trajtohen njëjtë si çdo qytetarë tjetër që dëshiron të përditësoj të dhënat në listë, transmeton Telegrafi Maqedoni.

“Do të vlejnë rregullat e përgjithshme që vlejnë për të gjithë qytetarët gjatë kohës së inspektimit publik. D.m.th. përpos mënyrës elektronike të verifikimit që e bën çdo qytetarë nëse ka interes që ti shikojë të dhënat e tij në listë, këto persona do të duhet të paraqiten në njësinë rajonale kompetente sipas adresës së banimit të personit konkret dhe duke plotësuar formularët adekuat dhe duke parashtruar dokumentin e vlefshëm të identifikimit ose pasaportën, të kërkojnë që të regjistrohen në listën zgjedhore”, ka thënë për Alsat M, Admir Shabani, zëdhënës i KSHZ.

Sipas Shabanit, KSHZ do të rishikojë edhe mënyrën se si këto qytetarë janë informuar për procesin e pastrimit të listës dhe shfrytëzimit të të drejtës së tyre të votës.

“Sigurisht që KSHZ edhe në atë kohë, kurdo që të jetë kjo periudhë, do të angazhohet në mënyrë maksimale që këto persona të informohen në mënyrë sa më adekuate që të shfrytëzojnë edhe mundësinë e fundit për t’u paraqitur, faktikisht për t’u regjistruar në listën e zgjedhësve që të munden pastaj ta shfrytëzojnë të drejtën e tyre zgjedhore”, është shprehur Shabani.