Mushkolaj: AAK nuk arriti të dalë nga gëzhoja e një partie rajonale

Aleanca për Ardhmërinë e Kosovës në një ceremoni të veçantë ka shënuar dje 16 vjetorin e themelimit të saj.

Në mesin e shumë pjesëtarëve të AAK-së, ishte edhe lideri i Nisma për Kosovën, Fatmir Limaj, së bashku me Jakup Krasniqin.

Gjatë këtyre viteve AAK-ja ka pësuar luhatje e sidomos në rezultat e zgjedhjeve, ku në ato të fundit të mbajtura në qershor të vitit 2014, AAK u radhit e katërta.

Analisti, Imer Mushkolaj, ka thënë për Telegrafin se përgjatë këtyre viteve AAK nuk ia arriti të dalë nga gëzhoja e një partie rajonale, pavarësisht përpjekjeve.

“AAK lidhet ekskluzivisht me emrin e Ramush Haradinajt dhe militantë të saj janë kryesisht ata që kanë qenë me Haradinajn në luftë, ose e adhurojnë për këtë shkak”, tha Mushkolaj.

Ai më pas shtoi se AAK nuk ia ka dalë të shndërrohet në një subjekt politik “të tretë”, në një alternativë ndryshe prej dy partive kryesore.

“AAK duhet të mendojë seriozisht për hapje ndaj ideve të reja, që njerëzit të bëhen pjesë e saj shkaku i programit dhe alternativës qeverisëse, e jo shkaku i Ramush Haradinajt. Po ashtu, AAK duhet t’i japë fund qasjes që më çdo kusht të bëhet pjesë e qeverisjes pa marrë parasysh çmimin”, u shpreh Mushkolaj, duke shtuar se disa parime megjithatë duhet të jenë të rëndësishme në këtë rast./Telegrafi/