Nishani: Shqipëria mbështet dialogun mes Kosovës dhe Serbisë

Shqipëria ka mbështetur fort dialogun mes Kosovës dhe Serbisë të ndërmjetësuar nga BE dhe mbështetur në mënyrë thelbësore nga SHBA. Pavarësia e Kosovës sot është një realitet i pakthyeshëm dhe ka demonstruar se ka qenë vendimi më i drejtë për paqen, stabilitetin dhe zhvillimin e rajonit. Kosova sot njihet nga më shumë se gjysma e vendeve anëtare të Kombeve të Bashkuara (109 nga 193 vende gjithsej) dhe jam i sigurt se procesi i njohjes do të vijojë më tej.

Kështu ka deklaruar presidenti i Shqipërisë, Bujar Nishani, i cili në vijim të vizitës zyrtare në SHBA u prit nga Këshilli i Çikagos për Çështjet Globale, njëri prej think-tankeve me reputacion të jashtëzakonshëm ndërkombëtar.

Kreu i Shtetit shqiptar zhvilloi një takim me Presidentin e Këshillit, Ambasadorin Ivo Daadler ish-përfaqësuesi i SHBA-së në NATO dhe më pas iu drejtua anëtarëve dhe të pranishme me një fjalë tematika kryesore e së cilës ishte: Shqipëria dhe Ballkani Perëndimor: Një e ardhme evropiane?

Në fjalën e tij Presidenti u ndal në tre projektet madhore për Shqipërinë, integrimi euroatlantik, bashkëpunimi rajonal dhe kontributi i saj në luftën kundër terrorizmit dhe ekstremizmit të dhunshëm.

Falë reformave, por dhe përkushtimit ndaj vlerave euroatlantike, Shqipëria në vitin 2009 u bë anëtare e NATO-s dhe që nga ai moment ka qenë dhe mbetet një partner aktiv i Aleancës, duke kontribuar me të gjitha kapacitetet dhe mundësitë e saj.

Projekti tjetër madhor i vendit mbetet integrimi në BE, për të cilin të gjitha institucionet shqiptare janë tërësisht të angazhuara në përmbushjen e reformave të brendshme, që do t’i mundësojnë arritjen e standardeve dhe përmbushjen e kritereve të nevojshme të anëtarësimit.

Ky proces në Shqipëri, tha Nishani, gëzon mbështetjen e mbi 90% të popullsisë, duke e vënë klasën politike para detyrimit moral dhe institucional për të respektuar këtë vullnet popullor dhe vijuar me rrugën e reformave.

Sa i takon angazhimit në kuadër të bashkëpunimit rajonal, politika e jashtme e Shqipërisë, tha Nishani, është maksimalisht e orientuar në forcimin e marrëdhënieve të fqinjësisë së mirë me të gjitha vendet e rajonit dhe integrimin e tij të plotë në proceset euroatlantike.

Sa i takon sfidës globale kundër terrorizmit dhe ekstremizmit të dhunshëm, kryesisht me baza fetare, presidenti Nishani nënvizoi angazhimin e lartë të Shqipërisë në këtë drejtim, si pjesë e koalicionit ndërkombëtar kundër ISIL/Daesh, të udhëhequr nga Shtetet e Bashkuara.