0Shares

Presidenti amerikan, Barack Obama i ka thënë të premten kryeministrit britanik David Cameron se SHBA-ja “e vlerëson një Britani të Madhe të fortë në një Bashkim Evropian të fortë”, duke paralajmëruar se nuk dëshiron ta shohë Londrën jashtë bllokut evropian, ka bërë të ditur Shtëpia e Bardhë.

Cameron, i cili është përballur me thirrjet e disa prej njerëzve më të fuqishëm në vetë partinë e tij për mbajtjen e një referendumi mbi atë nëse Britania duhet të dalë nga BE-ja apo jo, anuloi të premten fjalimin e shumëpritur mbi rolin e ardhshëm të Britanisë në BE për shkak të krizës së pengjeve në një impiant gazi në Algjeri, ku besohet se ka britanikë dhe amerikanë në mesin e pengjeve.

Obama dhe Cameron u konsultuan po ashtu në një bisedë telefonike për gjendjen e pengjeve në Algjeri dhe shprehën mbështetjen e tyre për operacionin ushtarak të Francës kundër militantëve islamikë në Mali.

“Kryeministri u zotua që të rimendojë marrëdhëniet BE – Britani përpara fjalimit të tij të ardhshëm”, bëri të ditur Shtëpia e Bardhë.

SHBA-ja gjithnjë ka qenë mbështetëse e qëndrimit të Britanisë në BE, me zëvendëssekretarin amerikan të Shtetit për çështjet evropiane, Philip Gordon, që tha se anëtarësia e Britanisë në bllok është “në interes të Amerikës”.

Cameron pritet që të shprehë zemërimin në rritje të britanikëve ndaj BE-së për veprimet e bëra në valën e krizës financiare.

“Njerëzit janë më se të zemëruar për faktin se vendimet merren pa pjesëmarrjen e tyre, gjë kjo që do të thotë se standardet e tyre të jetesës priten nëpërmjet masave të imponuara të kursimit apo se taksat e tyre përdoren për të shpëtuar qeveritë në anën tjetër të Kontinentit”, thuhet në fjalimin e Cameronit, pjesë të të cilit kanë rrjedhur në publik qysh para mbajtjes. /Telegrafi/

Të Ngjajshme

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)