LAJMI I FUNDIT:

Opozita sot në Kuvend, pavarësisht vërejtjeve në Projektligjin për “Trepçën”

Opozita sot në Kuvend, pavarësisht vërejtjeve në Projektligjin për “Trepçën”

Kuvendi i Kosovës do të mbajë sot seancën plenare ku pikë e rendit të ditës do të jetë edhe shqyrtimi i parë i Projektligjit për Trepçën.

Ky Projektligj ditë më parë u procedua nga qeveria pavarësisht reagimeve të ministrave serbë.

Projektligji për gjigantin metalurgjik “Trepçën”, është paraparë të kalojë dy leximet në Kuvendin e Kosovës, me një procedurë të përshpejtuar, brenda pak ditësh.

Ndërkaq opozita e cilësoi këtë projektligj si “të mangët” sepse sipas tyre kanë lënë jashtë Kuvendin në procesin e hartimit të këtij projektligji.

Por, pavarësisht kritikave të tri partitë opozitare kanë thënë se do të marrin pjesë në seancën e sotme të Kuvendit.

Shkodran Hoti nga zyra për media e Lëvizjes Vetëvendosje ka thënë për Telegrafin se deputetët e Vetëvendosjes do të jenë në seancën e sotme të Kuvendit.

Ngjashëm do të veprojnë edhe deputetët e Aleancës së Ardhmërisë së Kosovës. Kështu të paktën ka thënë për Telegrafin shefi i Grupit Parlamentar të AAK-së, Pal Lekaj.

“Po do të marrim pjesë në seancë”, ka thënë shkurt Lekaj.

Edhe deputetët e partisë së tretë opozitare, Nisma për Kosovën do të jenë në seancën e sotme. Këtë e ka konfirmuar sekretari organizativ i këtij subjekti Bilall Sherifi.

“Po, Nisma gjithsesi do të merr pjesë në seancën e sotme”, ka thënë ai.

Projektligji për “Trepçën” ngjalli protesta në veriun e Kosovës, të minatorëve të komunitetit serb, që thanë se do të vazhdojnë të kërkojnë ndalimin e shqyrtimit të këtij ligji në Kuvend, me të cilin, siç thonë, “rrezikohet ekzistenca e tyre në Kosovë”.

Seanca e sotme e Kuvendit të Kosovës do të nis në orën 15:00 ku përveç shqyrtimit të Projektligjit për Trepçën në rend dite ka edhe 12 pika të tjera.

R e n d i  i  d i t ë s

  1. Koha për deklarime jashtë rendit të ditës,
  2. Koha për pyetje parlamentare,
  3. Miratimi i procesverbalit nga seanca e mëparshme,
  4. Shqyrtimi i parë i Projektligjit për Trepçën,
  5. Votimi për emërimin e një anëtari në Komisionin për Kërkesa Pronësore,
  6. Votimi i Projektligjit për investimet strategjike në Republikën e Kosovës,
  7. Votimi i Propozim-Rezolutës lidhur me Kodin telefonik shtetëror të Republikës së Kosovës,
  8. Votimi i Propozim-Rezolutës lidhur me situatën aktuale politike në pjesën veriore të Republikës së Kosovës,
  9. Shqyrtimi i parë i Projektligjit nr. 05/L-117 për Akreditim,
  10. Shqyrtimi i dytë i Projektligjit nr. 05/L-047 për ndryshimin dhe plotësimin e Ligjit nr. 04/L-065 për të drejtat e Autorit dhe të drejtat e përafërta,
  11. Zgjedhja e një (1) anëtari të Këshillit Prokurorial të Kosovës,
  12. Shqyrtimi i Raportit mbi gjendjen në Shërbimin Civil të Republikës së Kosovës për vitin 2015,
  13. Shqyrtimi i Raportit të Agjencisë së statistikave të Kosovës për vitin 2015. /Telegrafi/