Reagon Nisma: Askush nga subjekti i jonë në Mitrovicë nuk kalojë në AKR

Nisma për Kosovën përmes një njoftimi për media, ka demantuar lajmin se simpatizantë të saj nga dega në Mitrovicë i janë bashkuar AKR-së.

“Të nderuar anëtarë dhe simpatizantë të NISMA për Kosovën dega në Mitrovicë, të nderuar qytetarë, ju njoftojmë se lajmi, se kinse “koordinatori” i NISMA’s në Mitrovicë, Bahri Rrustemi, është larguar nga dega e NISMA’s në Mitrovicë, për të kaluar në AKR, është jo i saktë”, thuhet në njoftim.

Më tej në njoftim është thënë se Bahri Rrustemi, ka qenë dikur i angazhuar në degën e NISMA’s në Mitrovicë, në cilësinë e koordinatorit (kohë për të cilën e falënderojmë për angazhimin e tij), por ka disa muaj që ai nuk është pjesë e degës së NISMA’s në Mitrovicë, dhe kryesia e degës së NISMA’s në Mitrovicë, për koordinator të degës, e ka zgjedhur, Hysni Ahmeti.

“Dega e NISMA’s në Mitrovicë, së bashku me të gjitha nëndegët e saj, janë më aktive se kurrë, dhe nesër do të marrin pjesë në Kuvendin Qendror të NISMA’s, me një numër prej më shumë se 30 delegatëve”, thuhet në fund të njoftimit./Telegrafi/