Ripërpunimi i këngëve, trendi më i ri në estradën shqiptare (Video)

Sezona e verës ka qenë e mbushur me projekte muzikore të publikuara nga artistët shqiptarë, pasi dihet tashmë që vera është një nga stinët më të angazhuara, por ata nuk po ndalen, pasi vazhdimisht kemi prurje të reja nga artistët shqiptarë.

Megjithatë një gjë e çuditshme është vërejtur së fundmi në tregun tonë muzikor. Nëse shikoni me kujdes, thuajse të gjitha këngët e publikuara nga artistët shqiptarë së fundmi, kanë qenë remix, të ripërpunuara nga këngët e mëparshme.

Ledri, Lumi B, Gjiko dhe Skerdi kanë sjellë së fundmi një remix të këngës “Messi” të reperit Dappy, gjersa më pas ka qenë Capital T që poashtu ka sjellë këtë këngë në një version tjetër të ripërpunuar, dhe e ka titulluar “Koka Kola”.

Por artistët më lartë nuk janë të vetmit, Vesa Luma me Big Basten kanë publikuar së fundmi një këngë të titulluar “Inna di dance”, e që në fakt është sërish një ripërpunim, pasi kjo këngë është kënduar nga Mr. Rez një vit më parë.

Edhe Edona Llalloshi bashkë me vëllaun e saj Milotin kanë treguar se janë duke ripërpunuar këngën “Simpatia”, të cilën e kënduan 20 vite më parë, dhe tani kanë vendosur ta sjellin në një frymë pak më ndryshe.

Mesa duket ripërpunimi i këngëve ka filluar të kthehet në trend tek artistët shqiptarë, mbase jetëgjatësia e shkurtër e projekteve muziikore që publikohen ditëve të sotme, ka bërë që ata të kthejnë drejtimin e tyre nga hitet e mëparshme të cilat dëgjoheshin me vite. /Telegrafi/