Serbia investon në veri e Kosova asnjë cent në jug

Derisa “Trepça” në veri të Kosovës nuk përballet me probleme të mëdha, pasi që shteti i Serbisë investon edhe me mjete buxhetore edhe me kuadër profesional, sa herë që ajo ndodhet në krizë, “Trepça” në jug përballet me vështirësi të mëdha dhe ndodhet buzë falimentimit, për shkak se shteti i Kosovës nuk investon asnjë cent

Gjiganti kosovar “Trepça” i ndarë në dy pjesë dhe i cili menaxhohet edhe nga serbët edhe nga shqiptarët, dikur ka punësuar një numër të madh të punëtorëve, ndërkohë tani, 17 vjet pas përfundimit të luftës, ndodhet buzë falimentimit.

Fjala “falimentim”, mbase nuk vlen për “Trepçën” në veri, e cila menaxhohet nga Jovan Dimkiq, pasi që, siç ka thënë ai, sa herë që “Trepça” ndodhet në krizë, atëherë është shteti i Serbisë, i cili ndërhyn për të financuar edhe me mjete buxhetore e edhe me kuadër profesional.

“Trepça” në veri ka të punësuar 1100 punëtorë të rregullt, ndërsa edhe një numër tjetër, të cilët ata i quajnë punëtorë rezervë paguhen nga të ardhurat që realizon kombinati. Nga xehja që eksploatohet në veri, siç e thonë serbët publikisht, jo vetëm që përfitojnë serbët e pjesës veriore të Kosovës, por edhe vetë shteti i Serbisë.

Drejtori i “Trepçës – Veri”, Jovan Dimkiq, u ka thënë medieve serbe se kombinati afaron pozitivisht dhe se pagat e punëtorëve sigurohen me kohë nga mjetet që sigurohen me transportin e xehes së plumbit dhe të zinkut, nga dy minierat, “Bello Berdo” dhe “Crnac”. /Zëri/Telegrafi/