Dr.Lirim Ukimeraj, otorinolaringolog

Dr.Lirim Ukimeraj
otorinolaringolog
tel. 044 116 361

Përshëndetje. Jam 21 vjeçar edhe kam hunden me probleme, nuk është normale, është shumë e ënjtur, sidomos kur kam sekrecione. Një kohë e gjatë më përcjell ky problem dhe nuk e duroj dot më. Dhe do doja të di nëse bëni ulje çmimi për persona me status të veçantë, si për shembull me "aftësi të kufizuara"?
Pres pergjigje!
Me respekt.

PËRGJIGJE:
Fillimisht ju ftoj për një vizitë që të shohim konkretisht se për çka bëhet fjalë dhe ti diskutojmë kërkesat tuaja dhe mundësitë e kirurgjisë. Konsultën do ta keni pa pagesë, ndërsa sa i përket çmimit për operim, sigurisht që në raste të caktuara bëjmë zbritje.

Përshëndetje, jam 23 vjeçe. Vitet e fundit kam patur ca eksperienca të pakëndshme me fytin. Nuk kam vuajtur kurrë as nga bajamet as nga ndonjë gjë tjetër, madje s’kam qenë kurrë në spital. Mirëpo, së fundmi kam patur ca probleme. Më saktë, më ngec çdo gjë që kaloj, po hëngra më ngec, po piva më shkon keq. Ka raste kur më bllokon frymëmarrjen plotësisht deri edhe në 10 sekonda. Kjo gjë më ndodh në çdo kohë....pak më parë gati vdiqa nga një gllënjkë çaj. Më kanë thënë që është emotive, por këtë version e hedh plotësisht poshtë. Do ju isha shumë mirënjohëse nëse dikush do të më tregonit ndonjë gjë rreth këtij problemi, pa shkuar tek doktori. Pse ndodh? Çfarë e shkakton? A mund të parandalohet, etj.
Ju faleminderit.

PËRGJIGJE:
Në bazë të të dhënave që lexova, nuk pashë askund që ju keni bërë deri tani ndonjë vizitë te mjeku. Në raste të caktuara edhe pas shumë vizitash dhe ekzaminimesh kemi vështirësi në dhënien e një mendimi të saktë apo diagnoze. Prandaj, filloni vizitat te mjeku që të shihen gjërat konkretisht që të mund t’u ndihmojmë.

Së pari ju falënderoj për temat që i trajtoni me shumë detaje të cilat na ndihmojnë të gjithëve. Mua më intereson a mund të bëhen dy operacione përnjëherë (ai i hundës dhe i veshëve, veshët i kam pak llaposh edhe hundën e kam pakëz të thyer).
Këtë pyetje po ua parashtroj për shkak se nuk mund të marr më shumë se 2 javë pushim nga puna.

PËRGJIGJE:
Jo, nuk bëhen që të dyja në të njëjtën kohë, ose të paktën unë nuk i bëj në të njëjtën kohë.
Por, po ju propozoj që fillimisht ta bëni njërin operim dhe nëse jeni të kënaqur me suksesin, atëherë bëjeni edhe operimin tjetër (kjo ishte pak për shaka).

Përshëndetje doktor. Unë jam 19 vjeçar, jam ne gjendje të mirë fizike, por kam disa shqetësime në lidhje me bajamet. Qysh para 3 vjetësh, disa herë kam pasur rritje të bajameve dhe qelbosjen të tyre. Mjeku më ka dhënë longacef dhe ilaçe përcjellëse. Analizat kanë treguar se kam streptokokus h beta, ndërsa tash për momentin kam bërë aso testin dhe më ka dalë 400. Kur koha është e ftohtë, kam humbje force, dhembje në pjesën e shpinës. Unë jam alergjik në penicilinë, nuk mund ta merr injeksionin e quajtur ekstracilin.
Çfarë më propozoni të bëj pasiqë jam në dilemë t’i heq bajamet apo të rri kështu sa të mundem. Respekt për ju, faleminderit!

PËRGJIGJE:
Kur kemi probleme të kësaj natyre me bajame, sidomos kur janë të shpeshta dhe që përcillen edhe me rritjen e ASO-s, atëherë propozojmë heqjen e bajameve.

Përshëndetje doktor Lirim. Kam një problem me hundët, pasi që hundët e mija sekretojnë shumë po thuajse qe një vit. Jam 18 vjeçar, kam vizituar mjekun otorinolaringolog, kam përdorur disa medikamente, mirëpo nuk kanë pasur efekt. Më intereson të di nëse kam nevojë për ndonjë ndërhyrje kirurgjike.
Ju faleminderit.

PËRGJIGJE:
Në bazë të informacionit që keni dhënë, në asnjë mënyrë nuk mund t’u rekomandoj trajtim kirurgjik për këtë problem që keni. Ju sugjeroj që fillimisht të konsultoni alergologun.

I nderuari Dr. Lirim. Kam djalin në moshën 7 vjeçe i cili ka problem të madh me bajamet. Kohët e fundit brenda 3 muajve ka pësuar 4 angina. Është trajtuar me penicillin 800.000, por herën e katërt reagimi i penicilines ka qenë shumë i dobët (siç ishte edhe rasti me Ospen). Gjendja e tij rendohet me temperaturë të lartë dhe molisje. Kam bërë të gjitha analizat të cilat çdo herë qe 5 vjet e deri tash, kanë dalë në suaza të normales (të fundit: strisho hundë, gojë, asto, crp, waler rosa, latex RF, fibrogjeni, pasqyra e gjakut).
Pas konsultave me pediatrin, referenca e tij ka qenë që të bëhet një operim për largimin e bajameve, ndërsa një doktor preferon që ta përcjellim gjendjen edhe për një kohë. Kam menduar që të bëj edhe testin e alergjisë, por nuk e di se sa do të gjej sukses në këtë veprim. Jam në hall dhe nuk di se si të veproj, prandaj kërkoj këshillë edhe nga ju.

PËRGJIGJE:
Pezmatimet e shpeshta të bajameve e posaçërisht anginat, janë një prej arsyeve më të shpeshta kur ne preferojmë operimin. Në këto raste duhet të kemi kujdes edhe në ekzaminimin e veshëve, sidomos kur fëmija ka pengesa në frymëmarrje me hundë që kryesisht është pasojë e bajames së tretë të rritur.

I nderuari doktor Dr.Lirim. Pjesa e brendshme e qiellzës më teret (thahet), sidomos aty ku pihet duhani dhe ku ka nxehje. Ka disa vite që e kam këtë problem. Tani vazhdimisht kam probleme, pasiqë një pjesë, diku thellë në qiellzë, ku takohen vrimat e hundës lart - më thahet dhe nuk mundem të përpij mirë dhe më ngacmon deri në vjellje. Kam përdorë disa barna, por pa kurrfarë suksesi. Doktor, pres që të më ndihmosh.

PËRGJIGJE:
Të dhënat që ju dërgoni janë shumë të pakta për të dhënë ndonjë mendim që do t’u ndihmonte sadopak. Arsyet më të shpeshta për një gojë të thatë janë frymëmarrja me gojë e jo me hundë, si dhe problemet me sekrecionin e gjëndrave të pështymës që në të shumtën e rasteve janë probleme sistemike, prandaj ju preferoj të bëni një konsultë tek otorinolaringologu për të eliminuar ndonjë problem të kalueshmërisë së hundës si dhe një konsultë te reumatologu.

Kam devijim në s.nasi te majtë, gjithashtu në sinusin sfenoidal të majtë prezantohet formacion cistik mirë i kufizuar me dimensione 14.9 x21mm. Në T1 hipo, në T2 hiper në difuzion, pa veçori.Doktor, si të veproj, a ka mundësi që ky formacion cistik të mos ketë ndikim të madhe tek unë edhe pse kam kokëdhembje dhe a kam mundësi t’i iki operacionit në të dy rastet.
Faleminderit.

PËRGJIGJE:
Në bazë të të dhënave që i keni dërguar kuptohet se ju keni bërë një RM të kokës për shkak të kokëdhimbjeve, me ç’rast është zbuluar cista në sinusin sfenoidal si dhe deviacioni i perdes së hundës/septumit nazal/. Që të dy këto patologji e sidomos cista në sinusin sfenoidal mund të jenë shkaktarë të kokëdhimbjeve, prandaj në këto raste preferohet trajtimi kirurgjik.

Përshëndetje doktor Lirim. Kam devijim në septum nasi të majtë, e gjithashtu n sinusin sfenoidal të majtë prezantohet formacion cistik mirë i kufizuar me dimensione 14.9 x21 mm. Në T1 hipo, n T2 hiper me difuzion pa veçori. Kisha dëshirë të dijë si t veprojë; a ka mundësi që ky formacion cistik të mos ketë ndikim të madh tek unë edhe pse kam kokëdhembje; dhe a ka mundësi t’i iki operacionit në të dy rastet?
Faleminderit.

PËRGJIGJE:
Në baze të të dhënave që i keni dërguar kuptohet se ju keni bërë një RM të kokës për shkak të kokëdhimbjeve, me ç’rast është zbuluar cista në sinusin sfenoidal si dhe deviacioni i perdes s hundës/septumit nazal/. Që të dy këto patologji e sidomos cista në sinusin sfenoidal mund të jenë shkaktarë të kokëdhimbjeve, prandaj në këto raste preferohet trajtimi kirurgjik.

I nderuari doktor Dr. Lirim. Dëshiroj te ju pyes për një problem qe kam me pjesën e brendshme të qiellzës. Pjesa e brendshme e qiellzës me teret (thahet ) herë pas here, sidomos kur jam në ambient ku pihet duhani dhe ka nxehje të lëshuar; pra aty ku ajri ku është më i thatë.
Këtë problem e kam qe disa vite me radhë; fillimisht më ka ndodhur tri deri në katër herë brenda vitit, por viteve të fundit më është shpeshtuar, ndërsa tani gati çdo javë kam probleme të tilla, pasi që një pjesë diku thellë ne qiellzë ku takohen vrimat e hundës lartë më thahet dhe nuk mund të gëlltitem duke më ngacmuar deri në vjellje. E kam vizituar mjekun e ORL-së, e ai me ka thënë se këtë e ke si pasojë e nxehjeve që e ke lënë të lëshuar gjatë natës dhe për shkak të qëndrimit në ambiente ku pihet duhani . Vet nuk e pi duhanin fare. Kam përdor disa barna, por nuk kanë pasur sukses.
Kur pastrohem në banjë, me siguri për shkak të ajrit më të lagësht disi ndjehem më mirë dhe çlirohem, por pas një kohe të shkurtër prapë më paraqiten problemet.
Pyetja e ime është: A ka diçka që do të ma bëjë qiellzën më të lagësht në mënyrë që ta largoj tharjen. Sa i përket fytit nuk kam ndonjë problem, përpos problemit të lartcekur me qiellzë.
Shpresoj në përgjigjen tënde.

PËRGJIGJE:
Të dhënat që ju dërgoni janë shumë të pakta për të dhënë ndonjë mendim që do t’u ndihmonte sado pak. Arsyet më të shpeshta për një goje të thatë janë frymëmarrja me gojë e jo me hundë, si dhe problemet me sekrecionin e gjëndrave të pështymës që në të shumtën e rasteve janë probleme sistemike.
Prandaj, ju preferoj të bëni një konsultë tek otorinolaringologu për të eliminuar ndonjë problem të kalueshmërisë se hundës, si dhe një konsultë tek reumatologu.

I nderuar doktor. Jam 26 vjeçar, por jetoj dhe punoj në Itali. Para 4 vitesh jam operuar në hundë në Kosovë. Para operacionit mjeku që më ka vizituar më ka thënë që kjo gjë ka ardhur si pasojë e një të rrezuare kur kam qenë i vogël. Në fillim nuk e kam ndjerë problemin, por duku u rritur, arrita në një moment që nuk mund të merrja më frymë. Në fillim vrimat e hundëve më bllokoheshin, herë njëra e herë tjetra. Nuk mund të flija dhe kisha shumë dhimbje koke. Operacioni sipas mjekut doli me sukses. Një vit më pas, unë isha mirë, merrja frymë lirisht dhe nuk kisha probleme me gjumin. Por, pas një viti më janë kthyer sërish të njëjtat simptoma. Ka tre vjet që përdori (spray nasale) për të fjetur, sepse ndryshe nuk ia dal dot.
Ju do të thoni se përse nuk e përsëris ndërhyrjen, por ky është pikërisht shqetësimi im. Problemi im, a mund të zgjidhet njëherë e përgjithmonë? Po sikur të operohem në Kosovë apo në Shqipëri, a janë tani mundësitë që operacioni im të jetë i suksesshëm? Nuk e di sa ju kam ndihmuar me përshkrimin e problemit tim, por do t’ua dija shumë për nder sikur të merrja një përgjigje tuajën.
Faleminderit shumë.

PËRGJIGJE:
Që në fillim po ju them se nga kjo distancë në asnjë mënyrë nuk mund t’u them se ju duhet të operoheni. Është e qartë se te problemet në frymëmarrje me hundë shkaktarë mund të jenë faktorët mekanik që gjithsesi duhet operuar dhe problemet në strukturat e buta me aktivitet dinamik në funksionin e hundës si organ, që fillimisht tentojmë t’i trajtojmë me medikamente.
Prandaj, ju sugjeroj të bëni një ekzaminim të detajuar, mundësisht ekzaminim endoskopik të hundës dhe të merret një vendim i drejtë për mjekim. Por edhe një gjë po ju them se, zakonisht problemet kronike kërkojnë trajtim afatgjatë.
Për sa i përket sprejit nazal që po e përdorni për 3 vjet për të rregulluar frymëmarrjen me hundë për të fjetur edhe pse nuk po e di saktë se për çfarë bari bëhet fjalë, mendoj se je duke vepruar gabim.
Përndryshe nëse vendos të operohesh, këtë mund ta bëjmë edhe në Kosovë.

Përshëndetje. Unë që po ju shkruaj jam një vajzë rreth 30 vjeçe që sapo kam bërë një ndërhyrje në hundë. Pasi kam hequr maskën pas 8 ditësh, kisha një hundë normalisht të fryrë, por të drejtë. Mirëpo, 5 ditë pas heqjes së maskës një natë kam fjetur pa e kuptuar mbi krahun e djathtë dhe në mëngjes jam ngritur e ënjtur në anën e djathtë të fytyrës dhe hunda ime ishte bërë disi e shtrembër. Shkova tek doktori im që u operova dhe më tha që është krijuar hematomë, prandaj dhe je ënjtur, por çdo gjë do të rregullohet. Hematoma ka rënë disi, jo plotësisht, por hunda nuk po më pëlqen, sepse anon pak nga krahu tjetër.
Të lutem doktor, më tregoni, sa kohë duhen që të kalojë një hematomë dhe a ka rëndësi mënyra e të fjeturit pas operacionit, sepse unë të tregohem e sinqertë, kam fjetur në krahun e djathtë pasi mjeku nuk më dha ndonjë këshillë se si duhet të fle.
Ju lutem, më shkruani disa këshilla të rëndësishme që unë duhet t’i respektoj dhe hunda ime të mos deformohet. Por, më tregon edhe cilat janë shkaqet që e deformojnë hundën?
Në pritje të përgjigjes tuaj, me respekt, I.A.

PËRGJIGJE:
Gjithsesi se menyra e fjetjes ka rëndësinë e vet në fazën e pas operimit, të paktën 2 muajt e parë, çka nënkupton se në këtë fazë duhet të kemi kujdes që mos të mbështetet hunda për jastëku. Kjo nuk duhet të ndodhë posaçërisht në dy javët e para kur hunda është e brishtë dhe mund të vie deri te devijimi, çka edhe ka ndodhur tek ju. Përndryshe, tërheqja e hematomës shpesh kërkon edhe dy muaj kohë. Sikur po ato ditë t’i bëhej hundës një shtyrje me dorë në anën e kundërt, ndoshta do të arrije ta vendosje në qendër, të fillosh tani me një veprim të tillë nuk bën ndonjë të keqe, por nuk mund t’u them se do të arrini ndonjë rezultat të dëshiruar.
Për sa i përket këshillave postoperative, zakonisht dy muajt e parë duhet të keni kujdes në aktivitetet fizike, te mos barten syze dielli, të mos zhyteni me kokë në ujë, kujdes në lojë me fëmijët.

Kam të dëmtuar të dëgjuarit në njërin vesh më shumë. Mirëpo, ajo që po më brengos është se kam ushtimë në vesh që më shkakton depresion. Ju lutem më tregoni se a ka farë terapie për këtë dhe nëse po, cila është ajo? Ju faleminderit për mirëkuptim.
Zamiri, Prishtinë.

PËRGJIGJE:
Në mjaft raste dobësimi i të dëgjuarit përcillet edhe me ushtimë në veshë, që gjenerohet nga vet organi i dëgjimit. Në mungesë të të dhënave të nevojshme si audiogramit dhe timpanogramit, të vetmen këshillë që mund të japë e që është e lehtë të thuhet, por e vështirë të zbatohet është që ju duhet në maksimum t’i shmangeni dëgjimit të zhurmës suaj në vesh, që kryesisht ndodhë kur jeni vetëm në ambient të qetë, në këto rrethana duhet të dëgjoni radio apo TV me aq zë sa mbulohet zhurma.

Doktor. Unë hundën e kam pasur normal, ama me kalimin e kohës ka formuar tul në maje edhe tash po duket shumë e fryrë. Unë dua ta heq, por desha t’ju pyes se a mund të rregullohet kjo me ‘injeksion’. Meqë unë jetoj jashtë Kosove, ju lutem më tregoni se kur mund të vijë për ndërhyrje? Faleminderit shumë.

PËRGJIGJE:
Do të ishte mirë sikur të më dërgoje ndonjë foto për t’u dhënë një sqarim sa më adekuat, ndërsa për termin mund të më kontaktoni në tel.

Jam 21 vjeçar, i kam veshët pak të kthyer (vetëm në pjesën e sipërme të laprës së veshit). Nuk kam problem shëndetësor, por m’u kanë bërë shumë kompleks. Desha të di a është problem mosha ime për ta bërë një intervenim të tillë dhe sa përqind mund të jetë i suksesshme ky operim, se kam frikë nëse do të mund ta bëj formën ashtu si duhet. Unë e kam edhe kohën pak a shumë të kufizuar, për sa kohë mund t’i heq fashat?
Ju faleminderit.

PËRGJIGJE:
Mosha juaj nuk është problem për operim, ndërsa sa i përket rezultatit të koreksionit mendoj se nuk mund të matet me përqindje, sepse është çështje e vlerësimit subjektiv.
Ndërsa sa i përket mundësive të rimodelimit të laprës së veshit, është çështje për të cilën nuk mund të bisedohet pa qenë prezent.

Jam 20 vjeç, por kam problem me hundë, e kam të shtrembër, por më pengon në frymëmarrje. Desha ta dijë a operohen vetëm vrimat e hundës apo aty ku është e shtrembër? Sa ditë zgjatë mjekimi?
Ju faleminderit. Pres përgjigjen tuaj.

PËRGJIGJE:
Pengesat në frymëmarrje me hundë shpesh janë si pasojë e shtrembërimit të perdes së hundës (septumit), e në këtë raste trajtimi është operativ. Ky lloj i intervenimit quhet septoplastica (lat.) dhe kryhet nëpërmjet të vrimave të hundës pa lënë shenjë nga jashtë dhe pa e prekur formën e jashtme të hundës.
Mjekimi zgjat 5 ditë.

Unë djalin timin e kam operuar për herë të parë kur ka qenë vetëm 4 vjeç nga bajamet 3 dhe pas operacionit djali përsëri e ka pasur gjendjen e njëjtë,  me gërhimë të madhe dhe ka fjetur me gojë të hapur. Pas disa kontrolleve, përsëri më është dashure që ta operoj,  po nga e njëjta bajame. Operacioni është bërë katër vjet pas operimit të parë. Ama, djali  përsëri flenë me gojë të hapur, por pa gërhimë.

Të lutem, doktor, më udhëzoni se si të veprojmë?

Me respekt, B.B.

PËRGJIGJE:

Bajamja e tretë (vegjetacionet adenoide) është një prej shkaqeve më të shpeshta të frymëmarrjes me gojë, kuptohet kur ajo është e rritur. Duke pas parasysh se në rastin e fëmiut tuaj ajo është eliminuar, atëherë duhet parë ndonjë problem të mundshëm në hundë.

Përshëndetje doktor, të lutem më shpjegoni këtë diagnozë: "Tu laryngis plicae vocalist lat sin" dhe si të mjekohet?

Faleminderit.

PËRGJIGJE:

Në këtë rast bëhet fjale për problem në ”tela” të zërit që janë 2, ju keni ndryshime në telin e zërit të majtë. Çdo ndryshim i tillë duhet të dërgohet ne ekzaminim histopatologjik që të përcaktohet lloji i sëmundjes,e pastaj caktohet terapia e duhur.

Përshëndetje i nderuari doktor Lirim. Jam infermier nga Prizreni, më konkretisht një pacient i juaji që jam operuar tek ju nga conca bulosa para 4-5 viteve, përndryshe para operimit kam pasur edhe dy intervenime tjera në hundë, septoplastica dhe rinoseptoplastica. Përsëri pas operimit të lartcekur, unë kam pasur edhe një operim të njëjtë septoplastica në Tiranë. Problemet që i kam pasur me frymëmarrje më janë lehtësuar, por problemet me nervin e hundës, Trigeminusin, i kam ende po jo aq të shprehura si më herët, por tani kohën e fundit e kam edhe një problem tjetër që më është shfaqur. Në përfundim të kanaleve të hundës kam një ndjenjë sikurse kam diçka në fyt, mjeku spec.i ORL-së që më ka vizituar thotë që nuk ke asgjë dhe më trajton me dg.rinopharyngitis ac. por unë kam edhe ndjenjën e tharjes së asaj pjese në përfundim të kanaleve të hundës me fyt.
Ju lus për këshillën tuaj.

PËRGJIGJE:
Për të eliminuar këto dyshime, duhet bërë endoskopinë e hapësirës së hundës dhe epifaringut. Me këtë lloj ekzaminimi, objektivizohet gjendja lokale.

Jam 21 vjeçare, në hundë kam qelb që më mblidhet në fyt. Mjeku më tha se kam infeksion të rëndë në hundë, më rekomandoi terapi me gentamicin, sinopen, degazon dhe bisolvon, një javë inhalim, klarimed dhe pika për hundë, sinomarin. Unë e përdora këtë terapi, por problemet nuk më janë zvogëluar pothuajse fare.
Pres ndihmën tënde, doktor.

PËRGJIGJE:
Për fat të keq nuk kam informacione për atë se sa kohë i keni këto probleme, sepse kohëzgjatje e problemeve na imponon edhe metoda të caktuara ekzaminimi, e pastaj në bazë të këtyre gjetjeve vendoset edhe për terapinë.
Ajo çka mund t’u ofroj me këtë formë komunikimi është shpëlarja e hapësirave të hundës me sasi të mjaftueshme të tretjes fiziologjike.

I nderuar dr. Kam vajzën 6 vjeçe. Që nga mosha 2 vjeç e gjysmë kishte shumë kollitje, ka bërë disa herë inhalim pas moshës 3 vjeçare. Testi i alergjisë ka dalë pozitiv në polen dhe pluhur të shtëpisë. Pas përdorimit të flonidanit, 6 muaj ka qenë shumë mirë, pas një viti problemet filluan prapë dhe frymëmarrja i shpejtohet edhe pse jam munduar që t’ia plotësoj të gjitha kushtet në shtëpi.

Më ndihmoni. Flm për mirëkuptim

PËRGJIGJE:

Nga të dhënat që ofroni mund të konkludoj se keni konsultuar alergo-imunologun përsa i përket problemeve të alergjisë. Mirëpo, në anën tjetër kam pak informacione për ndonjë problem tjetër të mundshëm që mund të lidhet me frymëmarrjen e rregullt me hundë e jo me gojë, që mund të jenë të lidhura me problemin e vetë hundës apo adenoidit (bajames së tretë). Kjo e dhënë është e rëndësishme sepse frymëmarrja me gojë te personat alergjik e vështirëson edhe më shumë situatën. Prandaj sinqerisht nuk mund të jap ndonjë mendim-propozim konkret për trajtim pa e njohur statusin lokal të fëmijës suaj.

Përshëndetje e nderuara redaksi. I nderuari dr. Lirim. Vajzës sime 9 vjeçe ka filluar t’i devijojë perdja, ka gjumë me frymëmarrje të rëndë dhe gojëhapur. Unë jam e shqetësuar për këtë, por edhe ana estetike po vërehet se ka devijim. Desha ta di, a ka mundësi kurimi pa intervenim kirurgjik? A është më mirë dhe më lehtë të trajtohet tani sa është më e vogël apo të presim sa të rritet edhe pak duke pas parasysh frikën e saj.
Faleminderit për kohën e kushtuar.

PËRGJIGJE:
E nderuar, frymëmarrja me gojë hapur gjithsesi është pasojë e devijimit të perdes së hundës, por gjithashtu edhe bajamja e tretë e rritur mund të japë një problem të tillë. Përndryshe, pse vjen deri te devijimi i perdes së hundës përpos lëndimeve që ndodhin prej momentit të lindjes dhe gjatë zhvillimit të fëmijës si dhe elementit trashëgues, arsyet tjera nuk dihen.
Trajtimi nuk mund të bëhet me medikamente, por vetëm me intervenim kirurgjik. Kur devijimi i perdes së hundës është shkaktari kryesor i frymëmarrjes me gojë, atëherë mosha nuk është pengesë për intervenim. Arsyeja se pse duhet bërë intervenimi, është zhvillimi jo normal i nofullës së sipërme dhe problemet e shpeshta të grykës si pasojë e frymëmarrjes me gojë.

Përshëndetje, i nderuar doktor. Ju përgëzoj për këtë faqe shumë efektive dhe të favorshme për fëmijët tanë. Vajza ime tani mbushë 2 vite. Para pak kohësh i kam bërë strishon e hundës dhe fytit. Strisho e hundës ka treguar se është izoluar bakteri moraxella catarhalis. E kam mjekuar me Eritromicin për dhjetë ditë rresht. Më duhet t’ia përsëris sërish të shikoj se a është përmirësuar. Mirëpo më brengos fakti, nga dhe si vjen deri te izolimi i këtij bakteri. Dhe nëse tani mjekohet a përsëritet sërish, a është për t’u shqetësuar edhe në të ardhmen?
Ju faleminderit shumë.

PËRGJIGJE:
E nderuar, bakteri i izoluar është një prej tre shkaktarëve më të shpeshtë të izoluar te infeksionet e rrugëve të sipërme të frymëmarrjes dhe trajtohet me shumë sukses nga një spektër i gjerë i antibiotikëve që janë në treg. Infeksionet zakonisht vjen nga ambienti që na rrethon, prandaj nuk duhet të brengoseni për këtë.

Doktor, kam devijim të hundës; kjo traumë ka ndryshuar paksa pamjen në anën e majtë të syrit ose qepalla e njërit sy, të themi më saktësisht, është më e tërhequr më shumë se ana tjetër e syrit të qepallës (djathtas).
Nëse e bëj korrigjimin e hundës, a do t'i kthehej një pjesë e lëkurës qepallës apo mos është kjo procedurë tjetër e operimit?

PËRGJIGJE:
Nuk besoj se korigjimi i hundes do te rregulloj problemin e syrit.

Para dy viteve më është paraqitur ushtima në njërin vesh e pas pak kohe edhe në tjetrin. Jam 55 vjeqar dhe punoj në KEK. Mjekët më thonë se nga mosha ka filluar plakja e nervit të veshit e poashtu edhe nga zhurma që është e pranishme në vend pune.
Kam bërë analizat e duhura,matjen e kohëpaskohshme të shtypjes së gjakut dhe të gjithë parametrat janë normal për moshën e cekur, thonë mjeket e Disp.med.punës në KEK.
Ju lutem, më ndihmoni me këshilla apo udhëzimet tuaja.
Përshëndetje, Shabani.

PËRGJIGJE:
I nderuar z.Shaban, është e vërtetë se puna për një kohë të gjatë në zhurmë sjell probleme në dëgjim e gjithashtu edhe zhurmë në veshë, ndërsa sa i përket moshës është shumë individuale në disa raste edhe trashëguese. Nuk e di nëse keni bërë testet e nevojshme që objektivizojnë problemet e dëgjimit, e nëse jo, atëherë duhet bërë një gjë e tillë dhe të konsultohet audiologu në rast nevoje.

Jam 20 vjeç, por kam problem me hundë, e kam të shtrembër, por më pengon në frymëmarrje. Desha ta dijë a operohen vetëm vrimat e hundës apo aty ku është e shtrembër? Sa ditë zgjatë mjekimi?
Ju faleminderit. Pres përgjigjen tuaj.

PËRGJIGJE:
Pengesat në frymëmarrje me hundë shpesh janë si pasojë e shtrembërimit të perdes së hundës (septumit), e në këtë raste trajtimi është operativ. Ky lloj i intervenimit quhet septoplastica (lat.) dhe kryhet nëpërmjet të vrimave të hundës pa lënë shenjë nga jashtë dhe pa e prekur formën e jashtme të hundës.
Mjekimi zgjat 5 ditë.

I nderuar. Pasi jam lexuese e rregullt e telegrafit dëshiroj të bëj një pyetje. Ka shumë vite më parë që më kanë thënë se kam një devijim të hundës. Problemi im është sidomos gjatë gjumit, kam problem me frymëmarrje, ndoshta pse më bllokohen vrimat e hundës. Gjumin e bëjë në dy jastëkë. Kam frikë nga operacioni. Shpesh edhe gjatë pastrimit të dhëmbëve nëse pasta shkumon, më vjen të kthejë, sepse shumë gërditëm. Nuk kam përdorë dhe as nuk përdori asnjë terapi. Kërkoj ndihmën dhe këshillat tuaja. Ju faleminderit dhe gjithë të mirat. Xheri

PËRGJIGJE:
E nderuara Xhevrije. Devijimi i perdes së hundës gjithsesi që të shkakton probleme në frymëmarrje me hundë dhe, në të njëjtën kohë, obligon frymëmarrje me gojë që nuk është normale. Ne shpesh e themi edhe si me shaka se të marrësh frymë me gojë është si të hash bukë me hundë. Në këtë rast preferohet operimi i perdes së hundës, që si procedurë operative zgjat përafërsisht gjysmë ore dhe bëhet me anestezi të kombinuar lokale dhe intravenoze me ç’rast nuk ndien dhimbje fare. Prandaj mos u frikësoni.

Doktor i nderuar, jam i shqetësuar për një problem në lidhje me hundën. Kohët e fundit, po më mblidhen shumë mbeturina (besoj që e kuptoni, sepse nuk po gjej shprehje më adekuate), në vrimat e hundës, madje nganjëherë edhe po më shkaktojnë çarje dhe hundët po më rrjedhin gjak.

PËRGJIGJE:
Sekrecionet e thara të hundës jenë pasojë e ndezjes akute apo kronike të mukozës së hundës, çka edhe kërkon trajtim, por paraprakisht duhet hteulumtuar shkakun. Trajtimi fillimisht është lokal me pika antibiotikësh në hundë si dhe lyerje e vrimave të hundës me yndyra vitaminoze.

I nderuar , jam 46 vjeqare, po kam problem me fytin. Po më djeg në disa raste kur po pastroj me detergjente për banjo, pllaka etj. Vetëm shpëlarja e fytit me ujë dhe krip po ma qetëson fytin nga njëherë po pështyj edhe gjak! Kjo gjendje po më përsëritet çdo tre muaj, më së shpeshti shtator dhe mars. E kam bërë fotografimin e mushkërive para dy jave dhe s’kam ndryshime negative.
Hajrija , Prishtinë.

PËRGJIGJE:
Problemet më të shpeshta që paraqiten në grykë (fyt) janë pasojë ose e frymëmarrjes me gojë për shkak të frymëmarrjes së vështirësuar me hundë ose e problemeve me lukth, kështuqë duhet të konsultoni edhe gastroenterologun.

I nderuar doktor. Kam probleme me hundë, në anën e majtë kam të zhvilluar sinusin, gjithashtu kam devijim të perdes së hundës. Pjesa e sipërme e hundës (ashti i hundës) është më i ngritur. Kam probleme shëndetësore dhe estetike. Jam 17 vjeç dhe pyes se kur mund të bëj ndërhyrje kirurgjikale në hundë, dhe se a mundem njëkohësisht ta rregulloj ashtin e hundës si dhe ta largoj sinusin.

PËRGJIGJE:
Në shumicën e rasteve devijimi i perdes së hundës përcillet edhe me probleme me sinusin në anën në të cilën është devijimi, prandaj edhe preferohet operimi i perdes së hundës. Është me shumë rëndësi lloji dhe shkalla e pezmatimit të sinusit që të vendosim edhe për operimin estetik në të njëjtën kohë.

Përshëndetje doktor. Jam Linda nga Prishtina, kam një vajzë dy vjeqe e cila i ka bajamet. Tash e një vit ka filluar të bëhet shumë e ndjeshme dhe shumë shpesh po fillon të kollitet dhe pediatrit e përgjithshëm më kanë thënë se i ka bajamet, strishoja ka dalë mirë, nuk ka ndonjë baktere në fyt apo hundë. Në gjumë ka një ngërhamë dhe hunda shumë shpesh po i zihet. Të gjitha analizat kanë rezultuar mirë. A mendoni se duhet patjetër të ketë intervenim kirurgjik apo ka mundësi në këtë moshë që përmes terapisë ta tejkaloj këtë fazë. Ju lutem, nëse ka mundësi të më përgjigjeni në këtë pyetje, sepse jam shumë e brengosur.
Me respekt.

PËRGJIGJE:
Në bazë të përshkrimit të problemeve që ka vajza juaj edhe unë mund të konkludoj që vajza juaj ka probleme me bajame e posaçërisht me bajamen e tretë. Vendimi për operim apo jo, merret kryesisht nga shpeshtësia e paraqitjes së problemeve dhe përdorimi i shpeshtë i antibiotikëve. Në këto rrethana ju preferoj të bëni edhe ekzaminimin e veshëve të vajzës suaj.

Jam 44 vjeçe dhe prej shumë vitesh vuaj nga problemet me hundën dhe zgavrën e saj. Sidomos në mëngjes kur zgjohem nga gjumi pothuajse e gjithë zgavra përbrenda gojës mbushet me sekret që zakonisht ka ngjyrën e bardhë, pra hunda ime nuk pastrohet dot përmes fryrjes së hundëve, por duhet pastruar përmes zgavrës së gojës, pra ky lëng i trashë nuk del rëndom nga hunda, por nga vrimat e saja brenda gojës. Është shumë e lodhshme kjo mënyrë e pastrimit, sepse jo rrallë më neverit dhe vjelli, pothuajse çdo ditë. Kam qenë te shumë mjek të këtij profili, por deri tani pa sukses. Me shpresë se do të marr përgjigje, ju përshëndes.
Lule Berisha, Prishtinë.

PËRGJIGJE:
Sekrecionet e shtuara që vinë nga hunda dhe na obligojnë t’i hedhim nëpërmjet gojës na bëjnë të dyshojmë në pezmatim kronik të hapësirës së hundës që në shumicën e rasteve trajtohet me barna me veprim lokal dhe në afat kohorë të gjatë. Fatkeqësisht pa një ekzaminim të detajuar, nuk mund t’ju ndihmoj më shumë.

Jam 21 vjeçe, vitin e kaluar jam operuar nga hunda, otoplastica, por mjeku ma ka shtuar devijimin, edhe pse nuk e kam pasur. Tani kam probleme me hundë shumë. Shpesh mbrëmjeve kam probleme me frymëmarrje. Unë dua që sërish të operohem, por kam frikë mos po mbes me ndonjë pasojë tjetër. Me respekt, Ana.

PËRGJIGJE:
Çdo rioperim i ka vështirësitë e veta, mirëpo, gjithsesi ka mundësi të mëdha për korrigjimin e problemeve, kështu që ia vlen të bëni një konsultë që gjërat të jenë më konkrete.

Jam 22 vjeçare, para disa jave më filluan disa simptome, siç janë, marramendja, ngritja e tensionit, takikardi, duart dhe këmbët e ftohta dhe të djersitura, frymëmarrje e vështirë (para disa ditësh). Jam vizituar te një internist dhe më udhëzoj t’i bëj analizat e gjakut si dhe të gushës, të gjitha më dolën mirë, e kam bërë edhe strishon e fytit dhe doli streptococcus pygenes.
Desha të di, a është kjo shkaktare e të gjitha këtyre çrregullimeve dhe çfarë të përdor për ta mjekuar? Ju faleminderit.

PËRGJIGJE:
Simptomat që ju përshkruani janë një reaksion kompleks i organizmit në një gjendje të caktuar dhe nuk mund t’i japim vetes një komoditet të tillë që ta fajësojmë vetëm një baktere pa pasur edhe informacione të tjera. Unë besoj që kolegu i cili ka kërkuar analizat ju ka dhënë informatat dhe terapinë e duhur.

I nderuar Dr. Unë kam Probleme me hundë, kam sinuset dhe devijim të perdes së hundës. Kam vizituar shumë mjekë dhe kam përdorur terapi, medikamente të ndryshme, mirëpo pas ndaljes së tyre vazhdon e njëjta gjë. Pra, sekreti i tepërt në hundë, dhimbje koke, plogështi dhe marrja e frymës me gojë. Unë jam 14 vjeçe dhe dua ta di përgjigjen tuaj dhe mënyrën më të mirë të shërimit. Faleminderit.

PËRGJIGJE:
Frymëmarrja me gojë gjithsesi që lidhet me devijimin e perdes së hundës, por në moshën tuaj duhet pasur kujdes që të ekzaminohet edhe bajamja e tretë, ndërsa kokëdhimbja mund të jetë, po e përsëris, pasojë e devijimit. Në të dy këto raste preferohet operimi i devijimit. Ndërsa, sekreti i tepërt është shenjë e pezmatimit kronik që duhet mjekuar me barna.

Përshëndetje dr. Unë më herët, por edhe tash e kam një vrimë, cipë, që ende nuk ka arrit të ngjitet. Ndihem mirë për momentin, pak dëgjimin e kam më të dobët. Doktor, desha t’ju pyes se kur të ngjitet cipa, a do të dëgjoj unë normal.
Flm, kaloni mirë. Fjolla.

PËRGJIGJE:
Infeksionet kronike të veshit zakonisht për pasojë kanë shpërthimin e cipës/membranës, por në të njëjtën kohë përcillen edhe me rënie të dëgjimit që është pasojë e infeksioneve të shpeshta, kështu që në këto raste nuk duhet fajësuar vetëm membranën. Ndërsa, mbyllja e membranës nuk ndodh vetvetiu. Se sa do të përfitoni nga mbyllja e membranës varet shumë nga shkalla dhe niveli anatomik/fiziologjik i dëmtimit të dëgjimit.

Përshëndetje. Një kohë të gjatë kam probleme me veshë. Krejt ka filluar në një mëngjes (nuk kisha fjetur mirë), më tingëllonte diçka në veshin e majtë (si klikim), sa herë unë flisja, apo lexoja me zë. Mendoja se është kaluese ngase atë ditë isha në stres, por klikimet vazhdonin të ishin konstante: sa herë lëshoja zë dhe shqiptoja rrokjet deri ne fund si dhe kur përtypesha. Në fillim vetëm në veshin e majtë, kurse ditët e fundit zhurma kalon sa në njërin vesh në tjetrin, rrallëherë në të dy veshët. Duhet të cek se kur flas nuk marr frymë mirë me hundë. Kam pas 4 vizita te mjeku i cili konstatoi se është inflamacion i veshit të mesëm, madje në vizitën e dytë ma pastroi veshin (mora barnat dhe sprej për hundë), por asgjë nuk ndryshoi. Klikimet vazhdojnë). Këto ditë bëra një audiogram (dëgjimi rezultoi shumë mirë).
Ç’duhet të bëj, çfarë më rekomandoni ju?

PËRGJIGJE:
Inflamacionet e veshit përcillen me probleme që ju po i cekni, këtë e vështirëson edhe më shumë frymëmarrja e vështirësuar me hundë, një gjendje e tillë nganjëherë kërkon kohë prej 3-4 javësh për kthim në normalitet. Në rast të kundërt duhen ekzaminime shtesë.

I nderuar Dr. Lirim. Vajza ime është 6 vjeçare, ka problem me hundë, rezultati i strishos është stapylococcus aureus.
Mjeku thotë se nuk ka nevojë të merr ndonjë antibiotik, mirëpo mua më brengos se vajza shumë i ngacmon hundët edhe ka raste kur edhe i rrjedh pak gjak. Gjumin e natës e bën mirë, vetëm se në orët e hershme të mëngjesit hundët i ushtojnë edhe shpesh i dëgjohet frymëmarrja. Një tjetër më thotë që e ka vajza paksa hundën e vogël, kështu që kur t’i rritet, i eliminohet ky problem. Përndryshe fytin e ka mirë, shumë rrallë sëmuret prej fyti ose ndonjë ftohje tjetër.
Faleminderit për mirëkuptim dhe presim përgjigjen e juaj.
Leonora.

PËRGJIGJE:
Në rastin konkret këshilla e mjekut ka qenë e drejtë, ndërsa sa i përket gjakderdhjes nga hunda te fëmijët është kryesisht pasojë e inflamacioneve apo ngacmimeve me gishtërinj. Në këto raste preferoj t’i lyeni vrimat e hundës me yndyrë vitaminoze psh. Panthenol, disa ditë.

I nderuar doktor, ju kisha lutur të më tregoni më tepër në lidhje me diagnozën: Rhinitis vasomotoria. Përndryshe, kam dalë edhe pozitiv në testin e alergjisë në Nikel. Përdori sprej Flixonase dhe Fervex çaj.
Mua po më shqetëson fakti që po më duhet pothuaj se çdo ditë të përdor çajin Fervex, kam hipersekret nga hundët.
A ka ndonjë perspektivë për këtë lloj sëmundje, apo më duhet të ballafaqohem tërë kohën me këto simptoma që po më molisin dhe rraskapitin. Unë jamm 42 vjeçare, simptomat e para kanë filluar para afro 6 viteve, por me një intensitet më të vogël në fillim, por me kalimin e kohës edhe simptomat janë bërë më të padurueshme.
Ju lutem, më tregoni diçka më tepër?
Flm. Merita.

PËRGJIGJE:
Rhinitis vasomotoria është gjendje e disbalancit në mes të dy sistemeve tona autonome, atij simpatik dhe parasimpatik që lidhet me funksionimin e mukozës së hundës, por në rastin tuaj ka disa të dhëna edhe për alergji, kështu që gjërat duhet shikuar në disa drejtime për trajtim adekuat. Duke pasur parasysh se Fervex është medikament e jo çaj, nuk duhet përdorur në vend të çajit.

Përshëndetje i nderuari Doktor. E kam një djalë, i cili para një viti është operuar prej bajames së parë dhe të tretë. Me rekomandim të mjekut i janë vënë edhe dy gypa në të dy veshët, pasiqë sa herë kishte pezmatim të bajameve i humbte edhe dëgjimi në një masë të konsiderueshme.
Para dy muajve, pas një kontrolli në ORL, mjeku ia ka larguar njërin gyp nga veshi, ndërsa gypin tjetër ia ka hequr diku para dy javësh.
Pyetja ime është kjo: përderisa i ka mbajtur gypat në vesh, tërë kohën ia kemi ruajtur veshët nga uji. Edhe sa kohë nevojitet që ta ruajmë dhe, sa kohe nevojitet që të mbyllet vendi ku kanë qenë gypat e vendosur.
Ju falënderoj shumë.

PËRGJIGJE:
Mbyllja e membranës së timpanit pas heqjes së gypave ndodh shpejt, brenda disa ditësh, por gjithsesi duhet bërë ekzaminim dhe në momentin kur mbyllen membranat nuk keni nevojë ta ruani fëmijën nga uji.

Përshëndetje! Jam Dita, e kam pasur cipën e shpërthurë. Nuk e di a ka arritur të ngjitet, kam vazhdimisht zhurmë dhe kam frikë se do më përsëritet ajo që kam përjetuar. Muaj më parë e kam pas veshin e mbyllur totalisht. Pres këshillën tuaj, poashtu më tregoni çfarë domethënie ka nëse ke kruarje në vesh?
Faleminderit.

PËRGJIGJE:
Që ta dini se është ngjitur cipa duhet të bëni një vizitë te specialisti i ORL, sepse nëse nuk është ngjitur, duhet të operoheni e deri atëherë duhet ta ruani veshin nga uji.

Doktor i nderuar. Vajza ime është 9 vjeçe, e ka bajamen e tretë të zhvilluar. Ndonjëherë i vjen ngapak edhe një aromë paksa e keqe, por me pastrimin që ia bëj, ajo eliminohet. Ka marrë terapi Lendacin, gjilpëra. Në Pejë, njëri mjek me thotë se duhet të operohet, tjetri thotë i largohet pas moshës 14 vjeçe. Jam në dilemë si të veproj. Dhembje fyti nuk ka, rrallë sëmuret.
Doktor, a duhet të operohet a jo dhe, a eliminohet vetëm bajamja e tretë apo krejt bajamet?
Pres ndihmën tuaj. Ju faleminderit dhe suksese.

PËRGJIGJE:
Se a duhet te operohet apo jo bajamja e tretë varet prej vështirësive që jep ajo, në radhë të parë pengesa në frymëmarrje me hundë, sekrecione (qyrra të shpeshta), goja e hapur në gjumë etj. Përndryshe ajo gjatë pubertetit zakonisht zvogëlohet (atrofohet), por nëse pengesat janë prezente, nuk ka arsye te pritet.

Jam një paciente nga Gjilani desha ta përshëndes doktorin edhe t’i them se unë i kam bajamet e 3-ta, kështu që po kam pengesa në frymëmarrje, gjatë natës nuk po mund të fle me gojë mbyllur, gripi më përcjell çdo herë. S’po di çka të bëj? A duhet të hiqen bajamet
sepse po kam probleme dhe non-stop me barna, dhimbje, temperaturë. Mjekët ku unë jam vizituar ndajnë mendime të ndryshme.
Poashtu, juve doktor ju falënderoj që më keni operuar nga sinusi para disa vjetësh.
Flm.

PËRGJIGJE:
Në rastin tuaj do ju preferoja të bëni një ekzaminim me endoskopi të hapësirës së hundës dhe pjesës ku ndodhet bajamja e tretë që të shihet qartë prezenca apo mosprezenca e saj, dhe pastaj të vendoset se çka më tutje.

Jam një vajzë 24 vjeçe. Kur kam qenë 9 vjeçe, jam operuar nga bajamet dhe kam hequr mish të huaj në hundë. Kam dhimbje veshi dhe ndjej që ato më kullojnë. Gjithashtu, ndjej që sekrecionet më kalojnë nga fyti, më shkakton dhimbje dhe nuk përcillem dot. Vetëm kur përdor sprej për hundët, sekrecionet më dalin nga hunda dhe fyti më lirohet. Jam vizituar dhe më kanë thënë që kam një infeksion të lehtë në vesh dhe kam përdorur disa ilaçe me pika. Megjithatë, kjo po më përsëritet. Kam bërë dhe një konsultë me një mjek tjetër e me ka thënë që kjo gjë të shkaktohet nga ambienti i mbyllur, duhet të dal shpesh në ajër të pastër e nqs kam dhimbje duhet të pi advil ose ibuprofen. Çfarë më këshilloni?
Faleminderit.

PËRGJIGJE:
Është shumë e vështirë të jepet ndonjë mendim i drejte pa ekzaminim, mund vetëm të supozojmë. Vetë fakti që është hequr mish i huaj nga hunda na detyron të mendojmë në përsëritjen e të njëjtit problem, ndërsa përdorimi i gjatë i pikave të hundës është i dëmshëm. Në anën tjetër rrjedhja nga veshët mund të jetë dyll, por mund të jetë edhe qelb apo myk, prandaj vizitoni specialistin e ORL që t’i hiqni dilemat.

Përshëndetje! Jam Alba, kam një problem. Në anën e majtë të veshit kam një zhurmë sikur që thonë më erdhi një haber i mirë edhe nuk po më ndalet. A është diçka serioze, çka duhet të përdori? Me këtë vesh kam pas probleme edhe më herët, e kam pas të lënduar.
Faleminderit, kalofshi mirë.

PËRGJIGJE:
Gjynah qenka me ta hequr zhurmën kur po të sjell habere të mira, haha, pak shaka. Vetë lëndimi mund të jetë një nga shkaktarët që shkaktojnë zhurma në vesh e që zakonisht janë të qëndrueshme. Por, për të gjetur arsyen e vërtetë që nuk është gjithmonë lehtë, duhet bërë një varg analizash dhe matjesh audiologjike. Prandaj, konsultojeni audiologun.

I nderuar. Unë kam problem me veshin e djathtë. Shpesh herë më kullon, nga veshi im del një farë lëngu i trash me një aromë të neveritshme. Kjo ndodh çdo ditë, po thuaj qe 9 muaj.
A mund të di se çfarë "sëmundje" është dhe si mund të shërohet?
Ju faleminderit. Blendi nga Korisha.

PËRGJIGJE:
Ky sekret i trashë dhe me erë të neveritshme është zakonisht qelb, kështu që sipas të gjitha gjasave bëhet fjalë për një infeksion kronik të veshit të mesëm që përcillet me defekt në membranën e timpanit. Në këto raste sa herë që kemi rrjedhje nga veshi duhet trajtim me medikamente, ndërsa trajtimi definitiv është operimi. Deri në një trajtim definitiv veshi i sëmurë duhet të ruhet shumë nga kontakti me ujë.

Jam 22 vjeçar. Kur isha 8 vjeç, nga temperatura e lartë humba dëgjimin e veshit të djathtë. Kam vizituar disa mjekë, por askush s’kishte zgjidhje për problemin tim.
Ju lutem, më ndihmoni, çfarë të bëj. Pres përgjigjen tuaj.
Me respekt Edonisi.

PËRGJIGJE:
Me gjithë dëshirën për t’u ndihmuar me informacionet që ofroni do të ishte joprofesionale të jepja ndonjë mendim.

Kam të dëmtuar të dëgjuarit në njërin vesh më shumë. Mirëpo, ajo që po më brengos është se kam ushtimë në vesh që më shkakton depresion. Ju lutem më tregoni se a ka farë terapie për këtë dhe nëse po, cila është ajo? Ju faleminderit për mirëkuptim.
Zamiri, Prishtinë.

PËRGJIGJE:
Në mjaft raste dobësimi i të dëgjuarit përcillet edhe me ushtimë në veshë, që gjenerohet nga vet organi i dëgjimit. Në mungesë të të dhënave të nevojshme si audiogramit dhe timpanogramit, të vetmen këshillë që mund të japë e që është e lehtë të thuhet, por e vështirë të zbatohet është që ju duhet në maksimum t’i shmangeni dëgjimit të zhurmës suaj në vesh, që kryesisht ndodhë kur jeni vetëm në ambient të qetë, në këto rrethana duhet të dëgjoni radio apo TV me aq zë sa mbulohet zhurma.

Përshëndetje! Jam Arta, 23 vjeçe. Kam probleme me vesh, e kam cipën e shpërthyer. Jam vizituar te shumë mjekë, disa me kanë preferuar operimin, ndërsa të tjerë më kanë thënë që cipa ka krijuar një shtresë dhe vetëm duhet të ruhem nga uji.
Doktor, kërkoj mendimin tuaj në këto pyetje:
1. A ka mundësi me u ngjit cipa? Nëse ngjitet a duhet të ruhem nga uji?
2. Cilat janë simptomat e cipën së shpërthyer?
3. A ka ndonjë rrezik sepse po më ‘kërcet’ veshi kur po komunikoj, ama jo rregullisht?

PËRGJIGJE:
Cipa ka mundësi t&eu