Barca, jo edhe aq mirë

23:24 / 16.01.2013

Barcelona ka barazuar në Camp Nou kundër Malagas me rezultat 2-2, në ndeshjen e parë çerekfinale të Kupës së Mbretit.

Ishin mysafirët ata që shënuan të parët me anë të Manuel Iturra (26’), pas një gabimi të Thiago Alcantaras.

Mirëpo, Lionel Messi shumë shpejtë e barazoi rezultatin (29’). Ai e pranoi topin nga Thiago, kaloi disa lojtarë, e humbi dhe e rifitoi topin dhe shënoi.

Thiago ishte i përfshirë edhe në golin e dytë të vendasve, pasi ishte ai që dërgoi harkimin nga këndi drejt kokës së Carles Puyol, i cili shënoi për avantazhin e katalunasve (30’).

Në pesëmbëdhjetë minutat e fundit, mysafirët mbetën me një futbollist më pak në fushë, pas përjashtimit të Monrealit me karton të kuq.

Megjithatë, edhe përkundër forcimit të formacionit me inkuadrimin e Xavit, Fabregasit dhe Pedros, Blaugranët nuk arritën të shënojnë gola të tjerë.

Ata madje e pranuan një gol, pasi që Camacho e barazoi rezultatin në minutën e fundit të kohës së rregullt (90’).

Ky rezultat lë gjithçka hapur për ndeshjen e kthimit, të cilën Barcelona e zhvillon si mysafir.

Duhet theksuar se nëse Barcelona e kalon Malagan dhe Real Madridi eliminon Valencian, do të shohim ‘el Clasico’ në gjysmëfinale. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.