Holyfield sfidon vëllezërit Klitschko
Boksieri legjendar i kategorisë së rëndë, Evander Holyfield, hapur ka sfiduar vëllezërit Klitschko, për t’i dhënë atij mundësinë që të përballet me ta në duelet më të mëdha në histori. Amerikani mund të jetë 49 vjeç, por ai nuk është i interesuar që t’i varrë dorëzat e tij, duke ftuar dy prej emrave më të mëdhenj të momentit në kategorinë e rëndë që ta sfidojnë atë.
“Mosha nuk është asgjë, vetëm numër. Klitschkot e kanë rastin jetësor që të përballen me Evander Holyfield. Ata do t’u thonë të gjithëve se më respektojnë dhe nuk duan të më rrahin”.
“Por, unë mposhta George Foreman, mposhta Larry Holmes dhe kam thënë të njëjtën gjë. Unë thashë se nuk do të fitoj kredibilitet nëse mposhti dikë që është më i moshuar se unë. Ata më thanë se do të më japin 20 milionë dollarë. Unë u thashë të sigurohen se ata do të luftojnë me mua, sepse nuk dua të jem ai që lufton plakun, por dua të jem plaku që i lufton ata”.
“Te Klitschkot është ndryshe, ata nuk po zgjedhin nëse do të përballen me mua, por unë kam thënë se do të përballem me ta. Gjithë ajo që ata duhet të bëjnë është të kuptojnë se të dyja palët do të fitojnë të holla dhe më pas të shohim se kush do të fitojë”, ka thënë Holyfield.
Vitali Klitschko, kampion në WBC do të përballet muajin e ardhshëm me gjermanin e pamposhtur, Manuel Charr, përderisa Wladimir Klitschko së fundmi mbrojti titujt e tij në IBF, IBO, WBA dhe WBO ndaj Tony Thompson.
Holyfield nuk ka qenë në aksion që prej duelit ndaj Brian Nielsen në Danimarkë majin e kaluar, ku ai regjistroi fitoren e 44-të në 57 duele në karrierë. /Telegrafi/
