Lucio: Juve ka 30 Scudetto
Ish-mbrojtësi i Interit, Lucio, i cili nga ky sezon do të bartë fanellën e Juventusit, ka mbështetur qëndrimin e presidentit të klubit, Andrea Agnelli, rreth numrit të titujve të Serie A që ka fituar Zonja e Vjetër.Në një deklaratë të fundit, Agnelli ka thënë se Bianconerët nuk i pranojnë metodat e Federatës Italiane të Futbollit për numërimin e Scudettove. Zyrtarisht Juve ka 28 tituj, ndërsa ata i kanë fituar 30 në fushë dhe pretendojnë se i kanë po aq.
“A ka Juventusi 28 apo 30 tituj? Presidenti e ka thënë gjënë e duhur rreth kësaj çështjeje”, ka deklaruar braziliani në një konferencë për media.
Më tej, ai ka theksuar se bardhezinjtë do të jenë konkurrentë të fortë në të gjitha garat në sezonin 2012/2013, duke përfshirë edhe Ligën e Kampionëve.
Juventusi do ta fillojë sezonin e ri me ndeshjen e Superkupës ndaj Napolit më 19 gusht. /Telegrafi/
