Nuk avancon Interi

22:40 / 27.01.2013

Interi ka arritur të fitojë vetëm një pikë në përballjen kundër Torinos në Giuseppe Meazza, e cila përfundoi me rezultat 2-2.

Zikaltrit e filluan mirë takimin duke shënuar herët me anë të Cristian Chivu (5’), mirëpo ishin të zbehtë më pas gjatë pjesës së parë.

Pas një gabimi të Fredy Guarin, mysafirët e shfrytëzuan shansin për të shënuar me anë të Riccardo Meggiorinit (23’) dhe ky ishte rezultati i fraksionit të parë.

Fillimi i gjysmës së dytë u takoi torinezëve, të cilët realizuan përsëri me anë të Meggiorinit (53’). Asistimi ishte i Alessio Cercit.

Inkuadrimi i Esteban Cambiassos u tregua frytdhënës, pasi argjentinasi e barazoi rezultatin falë asistimit të kapitenit Javier Zanetti (67’).

Deri në fund të takimit nuk pati gola të tjerë, ashtu që skuadrat u desh të pajtohen me ndarjen e pikëve.

Interi mbetet në pozitën e katërt në tabelë me nëntë pikë prapa liderit Juventus. Ndërkaq, Nerazzurët kanë vetëm tri pikë më shumë se rivali i qytetit, Milan, që gjendet një pozitë më poshtë. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.