Ranieri: Interi do ta kalojë krizën
Trajneri i Interit, Claudio Ranieri, thotë se ata do të arrijnë të dalin nga kriza aktuale së shpejti.“Ky është një sezon i pazakonshëm, pasi gjërat shkuan keq, pastaj shumë mirë, tash keq sërish, por Liga e Kampionëve rifillon dhe jam i sigurt se do t’ia dalim mirë”.
“Jam i kënaqur që do të përballem me Didier Deschamps sërish, pasi ai është një person të cilin e respektoj shumë. Kam dëgjuar se ai ka thënë se ne jemi favoritët e kësaj sfide, që ka kuptim, pasi Interi ka fituar gjithçka dy vite më parë”.
“Megjithatë, ne po kalojmë nëpër një periudhë të vështirë derisa Marseille është në formë të mirë, andaj ne duhet ta kthejmë baticën”, ka thënë Ranieri në konferencën për shtyp. /Telegrafi/
