Remi në Emirates
Emirates Stadium ishte arena e kryendeshjes së xhiros së 24 në Ligën Premier, ndërmjet Arsenalit dhe Liverpoolit, që përfundoi me rezultat 2-2.Një gabim në mbrojtje të lojtarëve vendas e shfrytëzuan Redsat, të cilët kaluan në avantazh që në minutën e pestë. Luis Suarez shënoi golin e 17-të sezonal në Ligën Premier falë edhe devijimit të Per Mertesacker.
Gjatë pjesës së parë, Pepe Reina bëri dy intervenime të mrekullueshme për t’ua mohuar golin Topçinjve.
Pas një ore lojë, Jordan Henderson kaloi gjithë mbrojtjen vendase për ta dyfishuar rezultatin (60’).
Mirëpo, pas një gjuajtje të lirë të Jack Wilshere, Olivier Giroud e ktheu Arsenalin në lojë (65’).
Giroud ishte i përfshirë edhe në golin e barazimit pasi asistoi te Theo Walcott, ndërsa anglezi e plasoi topin në rrjet (67’).
Barazimi nuk i konvenon asnjërës nga skuadrat që mbajnë pozitat gjashtë dhe shtatë në tabelë. /Telegrafi/
