Shqiptari pozitiv në doping test, përjashtohet nga Olimpiada
Peshngritësi shqiptar, Hysen Pulaku, është përjashtuar nga Lojërat Olimpike, Londra 2012, pasi ka rezultuar pozitiv edhe në testin e dytë anti-doping.
Sipas një raporti të Komitetit Olimpik Shqiptar, Pulaku rezuloi pozitiv gjatë një kontrolle të befasishme të Komitetit Olimpik Ndërkombëtar. Pulaku nuk i ka pranuar në asnjë moment rezultatet e këtij testi, duke thënë se ai nuk ka konsumuar substanca të ndaluara dhe është pajtuar që t’i nënshtrohet një testi të dytë, i cili ka rezultuar sërish pozitiv.
Shefi i delegacionit shqiptar në Londër, Viron Bezhani, ka konfirmuar se Shqipëria do të përfaqësohet nga vetëm 10 sportistë, pasi Pulaku është përjashtuar nga këto Lojëra Olimpike dhe atë e presin edhe dënime tjera nga ICO, autoritetet shqiptare dhe Federata Botërore e Peshëngritjes.
Pulaku është i vetmi peshëngritës, i cili nuk u është nënshtruar testeve anti-doping para Lojërave Olimpike, ndërsa kontrollimi i befasishëm e zuri atë në ‘ofsajd’, duke bërë që planet e tij për sukses jo të drejtë të dështojnë.
Është ky një fillim jo i mbarë i Lojërave Olimpike për shqiptarët, organizim ky që do të hapet në një ceremoni madhështore sonte mbrëma me fillim nga ora 22:00. /Telegrafi/
