Vendimi i FIFA-s, në Gjykatën e Arbitrazhit

15:02 / 25.12.2012

Vendimi i fundit i FIFA-s për Kosovën duket se është kryekëput politik, megjithatë politika vendore akoma vazhdon të heshtë. Përveç reagimit të ministrit të Kulturës, Rinisë dhe Sportit, Memli Krasniqi, akoma nuk kemi dëgjuar asnjë reagim nga institucionet tona lidhur me vendimin e fundit të FIFA-s. Madje në vitin që është në ikje fare pak është diskutuar në Parlamentin e Kosovës për sportin.

Mirëpo, nënkryetari i Federatës së Futbollit të Kosovës dhe deputeti i parlamentit të Kosovës, Bekim Haxhiu, mendon ndryshe. Njeriu i dytë i FFK-së hedh poshtë zërat që në Parlamentin e Kosovës nuk është diskutuar për sportin.

“Në parlament është folur dhe vazhdon të flitet për sportin. Vetëm unë me dhjetëra herë kam diskutuar për sportin, e këtë gjë e ka bërë edhe deputetja Vjollca Krasniqi. Unë në këtë rast flas në këndin e të dyja anëve edhe si nënkryetar i FFK-së, por edhe si deputet. Unë them se raportet në mes të FFK-së dhe politikës janë të mira”, ka thënë Haxhiu për Kosovapress.

Sipas tij, vendimi i fundit i FIFA-s është vendim politik dhe i papranueshëm për FFK. Ai thotë se FFK vendimin e FIFA-s do ta dërgojë në gjykatën e Arbitrazhit.

“Vendim i FIFA-s është i papranueshëm dhe ne do të reagojmë. Pavarësisht se presidenti i FIFA-s Stepp Blatter është një mik i yni, megjithatë ne duhet të reagojmë dhe do ta dërgojmë këtë gjë në gjykatën e Arbitrazhit. Dokumentet për gjykatën e Arbitrazhit janë duke u përgatitur dhe besohet se menjëherë pas vitit të ri të dërgohet në gjykatë rasti i Kosovës. Do t’i angazhojmë avokatët më të mirë të huaj dhe këtë padrejtësi që po na bëhet do ta fitojmë”, ka shtuar më tej Haxhiu.

Ndryshe, burime brenda FFK-së, thonë se vendimi i fundit i FIFA-s, ka një prapavijë. Sipas burimit të FFK-së vet FIFA ka treguar pikat në të cilat mund të ankohet FFK-ja. Ne e dimë se si dhe ku te ankohemi. Do ta fitojmë atë gjyq dhe pastaj FIFA vet do të dalë dhe do të deklarohet se ky është vendim i gjykatës se Arbitrazhit dhe nuk kemi çka ta bëjmë, e pastaj askush nuk ka se si të ankohet apo të reagojë”, ka thënë burim brenda FFK-së. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.