Vendimi i FIFA-s, një vendim refuzues

14:02 / 22.12.2012

Ministri i Kulturës, Rinisë dhe Sportit, Memli Krasniqi, ka reaguar ndaj vendimit të fundit të FIFA-s me një letër të hapur për publikun duke u shprehur se ky vendim është i padrejtë dhe i papranueshëm.

“Federata e Ndërkombëtare e Futbollit në vendimin që ia ka dërguar Federatës së Futbollit të Kosovës, thekson se Republika e Kosovës nuk mund të luajë ndeshje ndërkombëtare miqësore në territorin e Kosovës, pa lejen paraprake të Serbisë, si dhe nuk lejon flamurin dhe himnin shtetëror në ndeshjet miqësore ndërkombëtare jashtë territorit të Republikës së Kosovës”.

“Ky është një vendim i padrejtë dhe i papranueshëm më të cilin FIFA rrezikon të shkelë mbi parimet themelore sportive, e mbi të gjitha të drejtat elementare njerëzore”, thuhet në deklaratën e Krasniqit.

Më tej, ai potencon se me këtë vendim, FIFA konteston edhe shtetësinë e Kosovës të njohur shumica e shteteve anëtare të OKB-së dhe nga disa organizata të rëndësishme ndërkombëtare, siç janë FMN, Banka Botërore, BERZH, etj.

“Ky padyshim se është një nga lajmet më të papritura dhe të çuditshme, duke ditur misionin që ka sporti për të bashkuar dhe miqësuar njerëzit anekënd botës, pa marrë parasysh përkatësitë etnike, shtetërore, fetare, racore etj”.

“Vendimi i FIFA-s për ne është në fakt një vendim refuzues. Prandaj, pa dëshirën tonë ne jemi të detyruar që të gjejmë rrugë dhe mundësi për të realizuar të drejtën tonë elementare”.

“Ne do të mbështesim Federatën e Futbollit të Kosovës që të shfrytëzojë të gjitha mjetet dhe metodat ligjore duke adresuar çështjen tonë në instancat më të larta vendimmarrëse sportive”, ka përfunduar ministri Krasniqi. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.