Volejbollisti i Besës ia fali shpërblimin kryetarit të FVK-së

20:36 / 16.01.2013

Në ceremoninë e ndarjes së shpërblimeve për më të mirët e vitit 2012 në volejboll, volejbollisti i Besës, Skender Lajçi, kur doli ta pranojë çmimin në shenjë pakënaqësie “ia fali” shpërblimin kryetarit të Federatës së Volejbollit të Kosovës, Xhavit Mustafa.

Zgjedhja e më të mirëve të volejbollit të Kosovës për vitin 2012 është përcjellë me kundërthënie të mëdha. Federata e Volejbollit e Kosovës ka shpallur laureatët për vitin 2012, në mesin e pakënaqësive të shumta në veçanti nga volejbollistët e Besës, të cilët edhe pse janë kampion aktual kishin vetëm një volejbollist në mesin e 10-të më të mirëve.

“Unë mendoj që më meritorët që Besa është shpallur kampion janë lojtarët dhe jo kryesia, e të tjerët të cilët sot po marrin çmime në vend të lojtarëve. Andaj ja zoti kryetar ky çmim është për ju”.

“Nuk është e drejtë që nga skuadra kampione të jetë vetëm një volejbollist edhe atë nga fundi i 10-të më të mirëve. Ky proces është i montuar dhe pa asnjë vlerë”, përfundoi ai duke shokuar një pjesë të pranishmëve në sallë e disa të tjerë edhe i duartrokitën.

Kryetari i FVK-së, Mustafa, reagoi menjëherë duke ia kthyer: “Votimi është bërë nga trajnerët dhe kjo aspak nuk është punë e Federatës megjithatë ky është niveli i kulturës sonë edhe sot dhe njerëz të tillë bëjnë edhe këso lloj teatri”.

Sidoqoftë, për t’iu rikthyer shpërblimeve në mesin e shumë çmimeve që u ndanë, dy më kryesorët shkuan për volejbollistin e Drenica & Rukolli, Arbon Osmani, i cili e fitoi për herë të dytë këtë çmim si dhe volejbollisten Shemsije Asllanaj, e cila mori pikët maksimale gjithsej 50.

Në fund trajneri më i mirë në kategorinë e meshkujve u shpall ai i klubit Besa, Xhevat Buqani, ndërsa në konkurrencën e femrave u shpall Mehdi Mehmeti i KV Prishtinës.

Klubi më i mirë në konkurrencën e meshkujve u shpall KV Besa, ndërsa në atë të femrave KV Prishtina. /Telegrafi/

Komente

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi.
Ju lutem lexoni rregullat këtu.