Të harruar nga shteti

Fadil Shurdhaj, invalid i luftës, pasi humbi njërën këmbë në maj të vitit 1999 ka kritika në institucionet e vendit, pasi që, siç thotë ai, nuk kanë bërë asgjë për integrimin dhe socializimin e veteranëve dhe invalidëve të luftës së UÇK-së.

Shurdhaj, i cili është edhe kryetar i Shoqatës së Invalidëve të UÇK-së, thotë se ka qenë e nevojshme trajtimi dhe socializimi i invalidëve dhe veteranëve, duke marrë parasysh tmerret që kanë përjetuar ata.

“Ka qenë e nevojshme, madje ka qenë e domosdoshme sepse këta invalidë, luftëtarë, këta ushtarë kanë përjetuar gjithçka në luftën e Ushtrisë Çlirimtare të Kosovës”, tha ai, shkruan gazeta ‘Zeri’.

“Kanë mbetur pa dy këmbët, pa njërën këmbë, pa sy, pa duar dhe me ta është dashur të merret çdoherë Ministria e Shëndetësisë dhe çdoherë është dashur të merret Qeveria e Kosovës. Është dashur të trajnohen për jetë, pasi këta persona janë ata që kanë dhënë më së shumti, pas dëshmorëve”, thotë Shurdhaj, sipas të cilit vetëm pas 17 vjetëve kanë filluar edhe pasojat e përjetimeve të skenave të tmerrshme të luftës.