Tre fëmijë të sëmurë nga pertusis apo “kolla e mirë”

Kolla e rrezikshme e madhe ose në popull e njohur si kolla e mirë, është regjistruar te dy binjak nga Tetova dhe një foshnjë tremujore nga Shtipi, transmeton Telegrafi Maqedoni.

Ata nuk e kanë pranuar vaksinën e detyrueshme Di-te-per, e cila mbron nga kjo sëmundje e vështirë ngjitëse. Sipas të dhënave statistikore viteve të fundit nuk ka pasur raste të sëmundjes pertusis. Pediatret thonë se mjekimi zgjatë shumë, ndërsa ndërlikimet mund të shkaktojnë edhe përfundim fatal.

“Sëmundja është shumë serioze, pneumoni, meningjit, sulme epileptike dhe gjithsesi që është më e rrezikshme për foshnjat e porsalindura, thotë mjekja Venera Mitreva nda dispanseri për imunizim në poliklinikën “Bukureshti”.

Mjekët pranojnë se në disa vitet e fundit ka rënie të përfshirjes për imunizim, sidomos për rivaksinime. Prindërit nuk i vaksinojnë fëmijët nga frika prej shkrimeve në internet për gjoja ndërlikime pas injektimit.

Fushatat kundër vaksinimit dhe refuzimi i prindërve për mbrojtje të fëmijëve tyre, sipas mjekëve do ti rikthejnë sëmundjet e rrezikshme ngjitëse të cilët janë çrrënjosur me vite.

Në buletinet e Institutit për shëndet publik, rregullisht regjistrohen raste të shytave, fruthit dhe hepatiti B, sëmundje të cilat mund të parandalohen vetëm përmes vaksinimit të obligueshëm./Telegrafi/