LAJMI I FUNDIT:

Vazhdon protesta kundër KEK-ut

Vazhdon protesta kundër KEK-ut

Qytetarët e revoltuar me faturat e fryra të energjisë për muajin janar, do të vazhdojnë edhe sot protestën para Korporatës Energjetike të Kosovës (KEK). Një ditë më parë protestuesit kanë hedhur poçe elektrik në drejtim të KEK-ut. Ata thanë se muaji mars po afrohet dhe faturat e reja me çmimet e çrregullta po vijnë, andaj kërkuan nga të gjithë qytetarët që t’i bashkohen protestës.

Hedhja e rreth 50 poçeve elektrik dhe brohoritjet, sipas tyre janë përkujtim për KEK-un dhe të gjitha institucionet e ndërlidhura, që qytetarët mbesin përpara dyerve të kësaj korporate duke pritur përgjigje.

Në një komunikatë për media nga grupi i qytetarëve protestues, thuhet se ndaj qytetarëve kanë vazhduar shkyçjet me gjithë paralajmërimet që një gjë e tillë nuk do të ndodhë. Kjo është raportuar edhe nga protestuesit e pranishëm.

Nga qytetarët e pranishëm sot në protestë përsëri është kërkuar që me protesta të vazhdohet çdo ditë deri në përmbushjen e kërkesave.

“Andaj edhe njëherë ftojmë sindikatat, grupet e ndryshme shoqërore dhe të gjithë qytetarët e Kosovës që të marrin pjesë në protesta. Ata qytetarë që nuk kanë mundësi të vijnë në Prishtinë, për të protestuar para selisë qendrore të KEK-ut, le të mblidhen pranë zyrave të KEK-ut nëpër vendbanimet e tyre. Muaji mars po afrohet, faturat e reja me çmimet e çrregullta po vijnë, qytetarët kërkojnë përgjegjësi për fryrjet dhe çrregullimet e faturave”, thuhet në komunikatën për media, transmeton Kosovapress.

Ndryshe, bëhet e ditur se hapat e mëtutjeshëm të protestuesve, do të jenë në përputhje me veprimet e institucioneve dhe KEK-ut rreth çështjes së ngritur. Protesta e sotme si zakonisht do të mbahet para selisë qendrore të KEK-ut nga ora 12:00 në Prishtinë. /Telegrafi/